Sta Rosa Angels i Fenix SBT ta kompartí e promé lugá den dòbel A. Un detaye interesante ta ku Fenix a pèrdè su promé partido presisamente kontra di Angels. E dos timnan te ainda a logra 4 triunfo i a pèrdè 1 wega.
E promé buelta dje kampionato di sòfbòl den dòbel A a tèrminá den wikènt i e di dos buelta mesora a sigui tambe. E weganan tabata den Sam Bunting Ballpark den Brievengat.
Sta Rosa Angels i Fenix SBT a trit e fanátikonan un tremendo wega. Ku e skor pareu na 3 kareda, e wega a bai inen èkstra. Angels a skor 5 kareda pa gana ku skor di 8 pa 3 di Fenix.
Pitcher Lee-Ann Craanberg a kleim e gtriungo aki, miéntras ku Sandeline Reina a dal 4 hit den 5 turno na bate (5-4) pa tèrminá komo mihó batiadó. Pitcher pèrdèdó a resultá Suheydi Faneyt, miéntras ku Noa Fheling i Chantal Martis, kada un ku 1 hit den 2 turno na bate (2-1) tabata e mihó batiadó pa Fenix SBT.
E dos timnan tabatin mas wega den den wikènt tras di lomba den Sam Bunting Ballpark den Brievengat. Asina Sta Rosa Angels a dominá Liberty kompleto pa gana ku skor abultá di 14 pa 0. Pitcher Dianne Rosa a gana, miéntras ku Darlyse Salesia, Janiska Franklin, Angelique Anonia i Lisandra Ursulita a sobresalí na na bate, tur ku 2 hit den 3 turno (3-2). Pitcher Dayanara Pieternella a perde e wega. Shurvienska Wawoe a briyá na bate pa Liberty bayendo di 3-2.
Mas aleu Fenix SBT i Pichingolo tambe a duna fanátikonan un wega yen di tenshon ku hopi akshon. Pichingolo ku ta kampion di Kòrsou a skor e promé kareda den e promé mitar dje di dos inen. Esaki a sosode riba un hit di Suenady Fransisco. Den serada dje mesun di dos inen Fenix SBT ta empatá e wega na 1 kareda. Esaki tabata via di un fali di sakrifisio di Joanna Benita. Den di tres inen Fenix SBT a bolbe skor 1 kareda i bai dilanti 2 pa 1. Despues esaki niun dje dos timnan no a skor mas.
Yetsely Helmijr tabatin tremendo prestashon riba montikulo durante di 7 inen pa asina kleim e viktoria. Joanna Benita, Suheydi Faneyt i Ellianne Shakira Kock tabatin e mihó sifranan di bateo, kada un ku 1 hit den 2 turno (2-1).
Fenix SBT a hunga tambe kontra di Liberty i a gana e wega aki ku tambe tabata yen di tenshon ku skor di 5 pa 4. Suheydi Faneyt a resultá e picher ganadó, miéntras Riyanne Manuela ku 1 hit den 1 turno (1-1) tabata e mihó batadó. Picher Zulaima Croes a sufri e derota, miéntras ku Thalissa Louren ku 2 hit den 4 turno (4-2) tabata e mihó batiadó pa Liberty.
Mas aleu Pichingolo tambe a hunga dos biaha den e kontinuashon dje kompetensia den dòbel A di federashon di sòfbòl di Kòrsou. E tim kampion a gana ku skor abultá di 13 pa 1 di Souax SBT. Picher ganadó a resultá Taynise Prince Jacobus, miéntras ku Abigail Bentura i Suenady Fransisco tabata mihó batiadónan ku 2 hit den 2 turno na bate (2-2).
Finalmente despues dje weganan den wikènt, a skohe Sandeline Reina komo e mihó hungadó dje seri di weganan. Den e dos weganan di Sta Rosa Angels, ela dal 5 hit den 8 turno na bate, ela empuhá 3 kareda i e mes a skor 5 biaha.
