E tim di Fenix SBT a titulá kampion dje torneo di kalentamentu ku federashon di sòfbòl Kòrsou (CSB) a organisá den kuadro di Siman Olímpiko. Den final Fenix tabata muchu fuerte pa Pichingolo: 6 pa 2.
CSB ta un dje federashonnan ku a partisipá na e Siman Olímpiko di Federashon Deporte I Olímpiko Kòrsou (FDOK), organisando un torneo. Fuera di Fenix i Pichingolo a kompetí tambe den torneo Sta Rosa Angels.
E weganan a tuma lugá den Sam Bunting Ballpark i Buena Vista Ballpark. Un bon públiko amante di sòfbòl femenino ‘fast pitch’ a bishitá e parkenan durante e torneo. E timnan a ofrese e fanátikonan weganan na bon nivel.
Pichingolo ku ta e tim kampion di Kòrsou a kuminsá e torneo ganando di Sta Rosa Angels ku skor di 6 pa 5. Despues e tim di Sta Rosa a pèrdè tambe su di dos wega. Fenix a gana ku skor di 6 pa 1. E tim di Fenix despues a gana tambe di Pinchingolo ku skor di 10 pa 1.
A base dje resultadonan ei Fenix i Pichingolo a klasifiká pa final. Den e wega’ki atrobe Fenix a sali viktorioso ganando dje kampion di Kòrsou ku skor di 6 pa 2. E tim pues a titulá kampion invikto dje torneo di kalentamentu invikto ku CSB a organisá den kuadro dje Siman Olímpiko di FDOK.