Federashon Futbòl di Kòrsou (FFK) a posponé e promé weganan di play-off den promé divishon, mihó konosí komo ‘Kaya 6’. Esaki pa motibu ku Komishon di Apelashon ainda tin ku tuma desishon riba algun kaso i esaki por trese kambio den posishon final di algun tim.
Mayoria di wega dje bueltanan preliminar a tuma lugá den Stadion Dr Antoine Maduro na Kintjan. Tabatin algun enkuentro tambe den final dje di dos buelta den Stadion Ergilio Hato di Sentro Deportivo Kòrsou (SDK) na Brievengat.
‘Kaya 6’ ta e seri di wega entre e 6 ekiponan ku mihó puntuashon. Un nota remarkabel sinembargo ta, ku dos tim a sali empatá na di 5 puesto: Inter Willemstad i Victory Boys. Por sierto ku Victory Boys a apelá un desishon anterior kontra dje i ta pendiente di tratamentu dje apelashon aki.
E bueltanan preliminar a terminá ku Jong Holland na kabes ku 38 punto. Na di dos puesto a keda e tim di Vriendschap Eendracht Sterken Tegen Alles (VESTA) ku 30 punto. Centro Dominguito a kaba na di tres lugá ku 28 punto. Union Deportivo Bándabou (Undeba) i Skèrpènè a terminá empatá na di 4 puesto ku 27 punto, miéntras ku Inter Willemstad i Victory Boys tambe pues a kaba e prekampionato empatá ku 26 punto.
Tur kos tabata kla pa ‘Kaya 6’ kuminsá djasabra ku e enkuentro entre Jong Holland i Inter Willemstad. E tim aki tabatin un mihó saldo di gol ku Victory Boys. Sinembargo e tim di Nort Sapaté i besindario a apelá un desishon anterior, ku no a keda tratá pa Komishon di Apelashon. Tin mas ekipo ku a apelá kasonan ku ainda tin ku keda tratá.
Direktiva di FFK ku ta presidí pa Rignaal ‘Jean’ Francisca relashoná ku e kasonan di apelashon enkuestion, a saka promé un anunsio i despues a emití un komunikado pa prensa informando ku e komienso di ‘Kaya 6’ ta keda ‘kanselá te otro aviso’.
E komunikado ta bisa tekstualmente: “Ta asina ku tin algun protesta di klupnan ku Komishon di Apelashon tin ku tuma desishon riba nan. Djasabra siman pasa Komishon di Apelashon a sinta pero e kasonan a keda posponé paso entre otro, Victory Boys a pidi mas tempu”.
“Direktiva di FFK despues di a reuní den komienso di siman a hasi un súplika na Komishon di Apelashon pa atendé e kaso nan mas pronto ku ta posibel pa e buèlta di 6 por kuminsá djasabra,” e federashon ta sigui splika den e komunikado.
“Komishon di Apelashon, ku ta konsistí di huristanan, a hasi nan máksimo esfuerso pa esaki tuma lugá. Pa tuma di desishon mester di por lo menos 3 miembro di komishon pa deliberá i formalisá e desishon nan. Manera nos a avisá ayera nan no a logra drenta den kontakto ku e terser miembro di e komishon”.
FFK a duna tambe e sigiuente argumento: “Komo ku e desishon nan aki por trese kambio den numerashon i tabla di posishon, direktiva di FFK ta hañe obligá pa posponé e partidonan di e promé blòk di Liga MCB buèlta di 6 te un próksimo aviso”.
Finalmente direktiva di FFK ta deklará di lo reuní mañan djaluna pa por tuma desishon abase di e desishon nan tumá pa e Komishon di Apelashon: “Manera ya tresé dilanti, desison di Komishon di Apelashon ta definitivo i por trese kambio den e buèlta di 6 di Liga MCB. E partidonan di Liga MCB Segundo i Terser Divishon sí ta kontinuá nòrmal. Nos diskulpa pa kualke inkombiniensia ku esaki por a kousa”.