E finalistanan dje kampionato individual di Federashon Tènis di Mesa Kòrsou (FTMK) ta konosí. Den klase máksimo maskulino Dimitri Leon i Devon Melink a pasa pa final, miéntras ku den Masters e finalistanan ta Raymond Begina i Hensley Wentwoord.
Meskos ku e weganan preliminar, e finalnan individual tambe ta tuma lugá den sala di rekreo Irene Moreno na Muizenberg. E siman a habri ku e seri di weganan den semi final den divishon máksimo i Masters.
Den divishon máksimo aktual kampion Dimitri Leon a gana di Henny Metri 3-1. Den e otro semi final Devon Meilink a derotá Ravi Rajwani, tambe ku skor di 3-1. Melink tabata kampion na aña 2015. Leon i Melink ta topa otro djabièrnè anochi den e gran final.
Ayeranochi djamars 4 di dezèmber tabatin e semi final den Masters, despues ku den bueltanan preliminar 14 hungadó a bringa den 4 grupo pa saka e 2 mihónan di kada grupo.
Raymond Begina a batayá formalmente kontra Lucien Alberg, despues ku tur dos a hunga 5 sèt den nan wega anterior. Begina a gana ku skor di 3-1. Den e otro seri Hensley Wentwoord a superá Peter Wong ku skor di 3-0.
Begina i Wentwoord pues ta topa otro den final di Masters. Esaki tambe ta tuma lugá djabièrnè awor.
