Federashon Futbòl di Kòrsou (FFK) ayera, djasabra 11 di novèmber 2017, a ranka sali ku su kampionato hubenil. Un total di 22 tim repartí den diferente kategoria di edat ta kompetí den esaki.
E kampionato lokal hubenil ta keda hungá riba diferente vèlt di futbòl rònt Kòrsou. FFK ta anunsiá ku entrada na tur wega ta gratis i ta yama tur fanátiko di futbòl hubenil bon biní pa apoyá e futuro futbolistanan.
E kampionato hubenil di futbòl ta konsentrá den 5 kategoria di edat. Esakinan ta grupo di 9 aña i mas yòn, esta U9, U11, U13, U15 i U20. Riba djasabra ku a ranka sali ku e kompetensia, tabatin diferente wega riba tereno di FFK patras di Sentro Deportivo Kòrsou (SDK) na Brievengat.
Durante e parti ofisial dje apertura di kampionato hubenil, presidente di FFK Jean Fransisca a hiba palabra. E ta porsierto tambe presidente dje Komishon Hubenil di FFK.
E timnan ku ta partisipá den e diferente kategorianan di edat ta: 1. Atletiko Salinja; 2. Centro Barber; 3. Centro Dominguito; 4. Excellence School; 5. Fc Stallions; 6. Gemstones United; 7. Hubentut Fortuna; 8. Indekor; 9. Inter Willemstad; 10. Jong Colombia; 11. Jong Holland; 12. Mahuma; 13. New Song; 14. Quick’60; 15. Scherpenheuvel; 16. Sithoc; 17. Sithoc-Marchena; Subt; 19. U.D. Tera Kòrá; 20. Undeba; 21. Vesta i 22. Victory Boys.
E kampionato hubenil ta pa temporada 2017-2018. E kompetensia aki tambe ta konta ku patrosinio prinsipal di Maduro & Curiel’s Bank (MCB).
