E Siman Olímpiko di Federashon Deporte I Olímpiko Kòrsou (FDOK) ta den full swing. Awe djaweps ta di sinku dia yená ku aktividat deportivo den seis ramo di deporte. Asina tin sòfbòl, vòlibòl di beach, beisbòl, futsal, basketbòl i dominó. Anto esakinan ta tuma lugá den sinku diferente lokalidat.
E Siman Olímpiko di FDOK a kuminsá 4 di ougùstùs i ta den e siman final di dje Weganan Olímpiko ku ta tumando lugá na París, Fransia. FDOK via dje evento deportivo ke laga hóben i adulto sera konosí mas di aserka ku e 26 ramonan di deporte ku ta praktiká na Kòrsou.
Awe, djaweps 8 di ougùstùs, e públiko amante di deporte por gosá awe di vòlibòl di beach na Jan Thiel. Tin diferente wega planiá entre 6or di atardi pa 10or di anochi. Na Tio Daou Ballpark na Noord Zapateer tin entre 8or pa 10or un wega di beisbòl entre Sta Maria Pirates i Wild Cats. Amantenan di sòfbòl por disfrutá den e mesun oranan di 80r pa 10or dje wega entre Pichingolo i Sta Rosa Angels. Esaki ta tuma lugá den Sam Bunting Ballpark na Brievengat.
Ademas tin den sala di deporte Errol Rooi di Sentro Deportivo Kòrsou (SDK) na Brievengat tin weganan planiá den dos ramo di deporte. Esakinan ta futsal di mitar di 7 pa mitar di 9 di anochi. Despues di mitar di 9 pa 10or tin basketbòl.
Finalmente den un dje salanan di FDOK tin weganan di dominó. Esaki ta entre 7or te ku mitar di 11 anochi. FDOK ta den Otrobanda, dilanti di sentro komersial Colon i e edifisio di ministerio di Salubridat, Medio Ambiente i Naturalesa (GMN).
E Siman Olímpiko ta sigui mañan djabièrnè ku weganan den kuater diferente ramo di deporte. Entre 6or pa 10or tin atrobe vòlibòl di beach na Jan Thiel. Di 7or pa 11or tin weganan di pinpòn, esta tènis di mesa. Esakinan ta den sala di rekreo Irene Moreno na Muizenberg. Den Pool Arena riba Gosieweg, frente di Las Vegas Supermarket, tin biyar entre 8or i 11or. Anto tambe entre 8or pa 11or tin planiá un wega di sòfbòl entre Sta Rosa Angels i Fenix SBT den Sam Bunting Ballpark na Brievengat.
