E programa anual 2025 di klup kresiente di ahedres Capablanca ta yena ku torneonan di tema. Banda di e kampionatonan anual di klup pa e miembronan, Capablanca lo organisa diferente torneonan di tema ku ta habri pa un i tur. Lo tin por ehempel torneo di ahedres Fischer Random i torneo pa ekipo meskla, ku ekiponan forma pa tres hungado. Kada ekipo mester tin por lo menos un hungado femenino, minimo un hungado hubenil U20 i un di tres hungado pa kua no tin eksihensia (Open).
Aktualmente tin un torneo interesante di Rapid habri ta tumando luga na Capablanca. Ku kuater buelta tras di lomba e talento hoben, Kyle Vervuurt ta liderando e kompetensia ku 3.5 punto. Pero e situashon ta keda tenso, mirando ku tin kuater hungado pega su tras ku 3 punto kada i ku 3 buelta pa hunga ainda.
E siguiente torneo di tema riba agenda, ta e di dos edishon di e torneo Survival, ku lo kuminsa 1 di mart proksimo. E torneo aki ku a keda hopi gusta aña pasa entre ahedresistanan, tin un formato di eliminashon asina un partisipante perde 2 punto.
E ultimo ahedresista ku logra keda para riba pia lo gana un sena pa dos persona na un bon restorant. E prome edishon di e torneo aki a konta ku 34 partisipante i a finalisa despues di 9 buelta emoshonante ku Kyle Vervuurt komo uniko sobrebibiente.
Tur kos ta mustra ku e segundo edishon tambe lo bira un kompetensia espektakular. E torneo di ahedres Survival ta habri pa tur ahedresista lokal ku ke midi nan nivel di wega of ke purba wak kon largu nan por mantene nan mes den e grupo di partisipante ku ta keda bira mas chiki despues di kada buelta.