E kampionato di vòlibòl di Kòrsou a kontinua ayera djarason den Sala Errol Rooi di Sentro Deportivo Kòrsou (SDK) na Brievengat. Hurricane den klase femenino superior i Xaverianen den maskulino superior a gana fasil.
Apesar dje dos promé sètnan hopi pèrtá, Hurricane no a duna Watakeli hopi chèns i a gana ku skor di 3-0. E parsialnan tabata 25-23, 25-21 i 25-13.
Den superior maskulino Xaverianen ta aplastá Titus ku skor di 3-0. E parsialnan tabata 25-18, 25-15 i 25-21.
Djaluna tabatin kuater wega den klase A. Den klase femenino Stakamahakchi Guardian Group a derotá Shuatanari Lab de Med ku skor di 2-0: 25-19 i 25-16.
Xaverianen i Hurricane tambe tabatin tin un lucha tenas kontra otro, kaminda ku Hurricane ta e tim ku a sali for di porta grandi ganando den 3 sèt: 25-21, 26-28i 15-2.
Den e divishon maskulino Shuatanari ta kai vensí kontra Wishi Tigers 2-0: 25-19 i 25-18. Watakeli Building Depot tambe a bai kas kontentu despues di superá Xaverianen 2-0: 25-16 i 25-16.
E kampionato ta kontinua diadumingu awor ku un hornada kompletu di wega. E enkuentronan ta kuminsá for di sinkor di atardi den sala Errol Rooi di SDK na Brievengat.