Sta. Rosa Indians a gana su di tres wega konsekutivo den kontinuashon dje kompetensia di beisbòl den dòbel A. E tim Indjan a gana djadumingu ku skor di 14 pa 2 di Groot Kwartier Stars. E wega di ayera djaluna entre Wild Cats i Sta Maria Pirates no a sigui, pasobra Wild Cats a entregá un protesta.
E kampionato di beisbòl dòbel A di Federashon Beisbòl Kòrsou (Febeko) tabatin ku sigui ayera djaluna. E wega entre Wild Cats i Sta. Maria Pirates tabatin ku sigui den di kuater inen ku e Pushinan Brabu batiendo i e Piratanan di Sta. Maria dilanti ku skor di 7 pa 0.
E suspendé e wega diaweps siman pasá. Bala a dal e umpire na home plate i e no por a sigui den wega. Niun dje otro umpirenan no a remplasé tampoko, pasobra niun tabatin nan ekiponan di protekshon pa ora ta umpayá na home plate huntu ku nan. E ora ei direktiva di Febeko a konsultá ku e timnan i a disidí pa no sigui ku e wega.
Despues di haña konseho di e federashon internashonal di béisbol WBSC, directiva di Febeko a disidí pa sigui ku e wega ku Wild Cats pues na bate den di kuater inen i ku e skor 7 pa 0 pa Sta Maria Pirates. Pero Wild Cats a protesta kontra e desishon aki, i pesei e wega tòg no a sigui.
Pa loke ta trata Sta Rosa Indians, e tim a gana djadumingu su di tres wega siguí. Den su promé turno na bate ya e tim a pone e base pa e triunfo ora ku kuater Indjan a krusa plato. Den di dos i kuater inen Sta Rosa ta hinka 2 i 5 kareda mas pa tuma ventaha kómodo di 11 pa 0.
E Streanan di Kwartier a logra skor 1 kareda den di kuater i sinku inen. Esei tabata tur kos tambe. E Indjannan a hinkba 1 kareda den di sinku turno na bate i 2 kareda mas den e seis inen pa asina yega na e skor final di 14 pa 2.
Tristan Calmes tabata e pitcher ganadó. Den sinku inen ela pèrmití 2 kareda riba 7 hit, miéntras ku ela ponchá sinku batiadó. Gulasi Isenia den di seis inen e drenta na su lugá komo relevista i a sigurá e viktoria pa Sta Rosa Indians.
Swindley Lint i Aldair Daal tabata e mihó batiadónan pa Sta Rosa Indians. Lint a dal 3 hits den kuater turno na bate, entre nan 1 homerun. Ku e hitnan aki ela empuá 4 kareda pa su tim. Daal tabatin 1 hit den dos turno. Esaki tabata 1 homerun.
Promé ku triunfá riba Groot Kwartier Stars, Sta. Rosa Indians a triunfá ku skor di 7 pa 6 di Royal Scorpions. E tim Indjan a gana riba dia 30 di yüni tambe di Sta Maria Pirates ku skor di 6 pa 2. Dia 26 di yüni e Indianan a perde ku skor di 3 pa 2 kontra di Wild Cats.