Inter Willemstad ayeranochi, djasabra 25 di novèmber, a goliá Centro Barber ku skor di 5-0. Un dia promé, esta djabièrnè, Skèrpènè a gana ku skor minimo (1-0) di Centro Dominguito. Ku e triunfo aki e tim di Fraternan a pasa okupá un ratu e promé puesto den Liga MCB.
E kampionato den divishon superior di Federashon Futbòl Kòrsou (FFK) a sigui e wikènt aki. Tabatin wega djabièrnè i ayera, miéntras ku awe tardi ku anochi tambe tin dos wega program.
Skèrpènè a gana e wega di djabièrnè di Centro Dominguito ku gol di Nicolas Rocha Gomez. E atakante aki a skor na di 16 minüt di wega. Ta su di 8 gol den Liga MCB e temporada aki.
Ku e triunfo ei Skèrpènè a pasa pa okupá e promé puesto riba tabla di posishon ku 32 punto. Esaki ta 1 punto mas ku Jong Holland ku awe ta hunga kontra di FC Sithoc den Stadion Ergilio Hato. Ku un viktoria e tim trikolor ta bolbe pasa pa promé lugá.
E kampionato den Liga MCB a sigui ayera ku dos wega. Den Stadion Ergilio Hato di Sentro Deportivo Kòrsou SV Vesta i SUBT a topa otro. Esaki a tèrminá den un empate na 0 gol.
Den Stadion Dr. Antoine Maduro e tim di Centro Barber a sufri un derota grandi. Inter Willemstad a gana ku skor di 5-0. Na di 37 minüt di wega Terrence Richardson a habri e skor. Despues Stallone Isenia na di 49 minüt a ampliá e skor na 2-0. Sinku miüt despues Rudrick Pop a skol e di 3 gol. Na di 70 minüt Ruensley Leuteria ta hasi e wega 4-0 i finalmente na di 79 minüt Shakir Amerikaan tambe ta skor.
Ku e triunfo Inter Willemstad a fortifiká su posishon na di 4 lugá riba e tabla di posishon. E tim di Vredenberg i bisendario tin awor 24 punto for di 14 wega.
E kampionato ta sigui awe ku Jong Holland kontra FC Sithoc den Stadion Ergilio Hato i den Stadion Dr. Antoine Maduro ta topa otro Victory Boys i Undeba. E weganan aki ta kuminsá 6or di atardi’ki.
