E selekshon di atletismo di Jamaica a gana e di 50 edishon di Carifta Games ku a tuma lugá na Bahamas. E tim aki a konkistá 78 medaya, di kua 40 di oro. E tim di atletismo di Kòrsou a gana 2 medaya: un plata i un bròns.
Kòrsou a kompetí ku diesun atleta na Carifta Games. E kompetensia akí a finalisá ayera djaluna, despues di a ranka sali djaweps siman pasá na Bahamas.
Dena-Marie Barby a kuminsá konkistando e promé medaya pa Kòrsou riba e promé dia di kompetensia. Ela kore un tremendo 1500 meter i asta tabata solido na promé lugá durante e kareda di distansia largu akí. Pero finalmente ela pasa e liña final komo di dos, bon pa medaya di plata.
Despues dje konkista dje promé medaya ei, tabatin hopi espektativa pa prestashon dje otro atletanan di Kòrsou. Pero vários kompetensia den e diferente disiplinanan tras di otro, niun atleta mas a logra sali den e promé tres lugánan.
Tabata Zsa Zsa Frans ku finalmente a konkistá e di dos medaya pa Kòrsou. Ela gana bròns riba distansia di 100 meter ku opstakulo. E tabata pues e di dos atleta femenino ku a logra gana pues un medaya i asina e tim aki a tèrminá empatá na di 14 posishon huntu ku e selekshon di Guyana Franses.
Riba e tabla di medaya overall, Kòrsou a empatá ku mesun tim di Guyana Franses na di 19 posishon. E timnan di Aruba i Sint Maarten no a figurá riba e tabla di medaya.
Jamaica pues tabata ganadó apsoluto ku 78 medaya: 40 di oro, 22 di plata i 16 di bròns. Bahamas a gana 46 medaya: 10 oro, 13 plata i 23 bròns. E di tres puesto a bai pa Trinidad & Tobago ku 31 medaya: 9 oro, 10 plata i 12 bròns.
