Jong Holland a gana su wega inisial dje kampionato di CFU Club Shield. E tim trikolor a derotá e kampion di St. Lucia B.A.Y.S. FC ku skor di 3 pa 0.
Jong Holland ku a sali kampion na 2021 ta representando Kòrsou den e kampionato di Karibe pa klùpnan kampion yamá CFU Club Shield.
Pa motibu di problemanan entre klùpnan i direktiva di Federashon Futbòl Kòrsou (FFK), no a tèrminá e kampionato di 2022 ni tampoko hunga esun di 2023. Pa e motibu aki Jong Holland komo ultimo kampion ta representá Kòrsou den e kompetensia.
Porsierto ku e kompetensia ta tuma lugá na Kòrsou i ta den full swing kaba. Ela kuminsá djaweps siman pasá i ta hungando den tantu Stadion Rignaal Jean Francisca di FFK komo Stadion Ergilio Hato di Sentro Deportivo Kòrsou (SDK).
Un total di 20 klup kampion di isla i paisnan den Kariba ta kompetí kontra di otro. Ta hunga e sistema di nòkout, esta derota ta nifiká eleminashon dje kompetensia.
FOTO DI: JACINTO DE JESUS