Despues di a pèrdè su promé wega den Kaya 6, Victory Boys a rekuperá no a sufri mas derota i awor asta ta kompartí e promé puesto ku Jong Holland i Inter Willemstad. Tur tres tim tin 7 punto for di 4 wega: 2 triunfo, 1 empate i 1 derota.
Federashon Futbòl Kòrsou (FFK) a sigui ayera djadumingu ku e kompetensia den Kaya 6 den promé divishon. Tabatin atrobe tres wega ku a hunga pareu den Stadion Ergilio Hato, Stadion Dr. Antoine Maduro i Stadion di FFK.
Victory Boys a gana ku skor di 2-0 di SUBT den Stadion Ergilio Hato den Brievengat. Stalin Lopez Rodriguez na di 19 minüt di wega a pone e tim di Zapateer i bisendario dilanti. Na di 38 minüt Charles Martina a ampliá e skor i seyá pues for di e promé tempu e viktoria.
Den Stadion di FFK e tim di Jong Holland a derotá Skèrpènè 3-0. Tabata Dwaylon Maria ku na di 32 minüt a pone e tim Trikolor 1-0 dilanti. E mes hungadó aki na di 59 minüt di wega a dòbel e skor. Ethelbert Daal tambe tabata éksitoso anotando e di tres gol na di 72 minüt.
E di tres wega a tuma lugá den Stadion Dr. Antoine Maduro. FC Sithoc tabata riba kaminda pa zona un kampanaso, pero Inter Willemstad den final dje wega a skor e gol di empate. Na di 15 minüt Jamian de Kaster a pone e tim Kolegial 1-0 dilanti. Na presisamente 90 minüt di wega e hungadó Shuremy Felomina a salba su tim ku e gol di empate.
Awor tin tres tim empatá na promé lugá den Kaya 6 ku 7 punto: Jong Holland, Victory Boys i Inter Willemstad. Remarkabel ta e prestashon di Victory Boys ku a sali pèrdè su prome wega pa despues gana dos i empatá unu. Na di kuater puesto tin Skèrpènè ku 6 punto: 2 viktoria i 2 derota. SUBT i FC Sithoc ta sigui ku 3 punto.
