Kenley Jansen ayera, djamars 31 di oktober, a registrá su di dos wega salbá den final di Major League Baseball (MLB). Ela hasi esaki den gran forma via di un asina yamá ‘six pack’, esta dominando e 6 bateadonan ku ela enfrentá i asina guia su tim Los Angeles Dodgers na un triunfo di 3-1 riba Houston Astros.
Ku e triunfo aki Dodgers a empatá e seri kontra Astros na 3-3. Awe’nochi tin e di 7 wega pa disidí kua tim ta sali kampion.
Despues ku djadumingu Kenley Jansen a sufri su promé derota e temporada aki den Liga Grandi, ayera’nochi ela bini bèk desidido riba montikulo. Den gran forma ela kumpli ku deseo di mènedjer Dave Roberts i e fanátikonan di Dodgers. E yu di Kòrsou a haña e tarea pa den e dos último entradanan no pèrmiti nada na Astros.
Kenley Jansen a drenta den di 8 entrada i mesora a retirá e 3 bateadónan di Houston di kua 2 ku poche. Den Astros su di nuebe turno na bate tambe e picher yu di Kòrsou tabata ‘por la goma’, esta kasi tur su lansamentunan tabata riba plato. Den e entrada aki tambe ela retirá tur tres bateadó, di kua e último -Carlos Bertran- ku ponche.
E ‘closer’ yu di Kòrsou ku tin un salario anual di 10 mion dòler, a uza total 19 lansamentu, di kua 1 so tabata bola. Esaki ta un promedio di 3 lansamentu pa bateadó i ta demonstrá e tremendo kòntròl ku Kenley Jansen tabatin. Awor e tin 2 wega salbá, 1 pèrdí i un porsentahe di kareda pèrmití di 3.52. Esaki komo ku Astros a skor 2 kareda kontra dje den e seri final aki, miéntras ku ela ponchá 6 bateado den 7,2 entrada.
Picher Rich Hill a habri riba montíkulo pa Dodgers. Den 4,2 entrada ela pèrmiti 1 kareda i 4 hit di Astros. E kareda aki tabata un homerun di George Springer den di 3 entrada. Pa tene e skor mininal mènedjer Roberts a bai bèk su bulpèn di semper i konsekutivamente ela uza Brandon Morrow, Kenta Maeda i último Kenley Jansen. Tur 3 a kumpli ku nan tarea pa no aseptá mas kareda.
Entre tantu e bateadónan di Dodgers a logra produsí 3 kareda, apesar ku picher Justin Verlander di Astros den e promé 5 entradanan tabata dominá nan hopi bon. Tabata den nan di 6 turno ku Dodgers a logra skor 2 kareda kontra e picher aki riba un doblete di Chris Taylor i flai di sakrifisio di Corey Seager. Den Dodgers su di 7 turno na bate Joc Pederson a dal un homerun i asina duna ‘closer’ Kenley Jansen un kareda mas di siguransa: 3-1.
Awe’nochi tin e di 7 i ultimo wega di World Series 2017. Picher habridó pa Dodgers ta Yu Darvish i pa Astros esaki lo ta Lance McCullers Jr. Ku tur probabilidat Kenley Jansen lo tin ku subi montíkulo atrobe den kaso ku Dodgers drenta di 8 i 9 entrada dilanti den skor. E pichernan habridó Clayton Kershaw i Alex Wood tambe lo ta kla pa yuda den relevo.
