Federashon Deporte Olímpiko Kòrsou (FDOK) ayera, djaweps 1 di febrüari 2018, a presentá e deportistanan ku ta bai representá Kòrsou den Central American and Caribbean Games (CAC). E asina yamá ‘kick off’ aki a tuma lugá riba vèlt di sòfbòl na Buena Vista.
Despues di un temporada largu, Kòrsou su deportistanan ta kompetí atrobe riba plano internashonal. Despues di 8 aña nan ta representá Kòrsou den vários disiplina. Algun a klasifiká kaba pa CAC 2018, ku ta tuma lugá Baraquilla, Colombia.
Presidente di FDOK, Rignaal ‘Jean’ Francisca, a hiba palabra. Meskos tambe Ruthsel Martina ku ta fungi komo ‘chef de mission’ dje delegashon deportivo di Kòrsou. Despues tabatin presentashon dje deportistanan i nan federashonnan siguí pa diskurso di minister di Deporte Marilyn Alcalá-Wallé (PAR).
E mandatario a yama dilanti kolega minister di Finansas Kenneth Gijsbertha (MAN) i parlamentarionan Curtley Obispo (PAR) i Rennox Calmes di PIN. E minister di Deporte a enfatisá ku ta un tim di gobièrnu ta traha den kuadro dje partisipashon di Kòrsou na CAC 2018.
E deportistanan lokal tin ainda 5 pa 6 luna pa entrená fuerte pa CAC 2018. Un bon prestashon ganando medaya por nifiká nan klasifikashon tambe pa Weganan Panamerikano 2019 na Perú.
