Favela Street Kòrsou den estrecho koperashon ku Excellence School i Federashon Futbòl Kòrsou (FFK) a organisá un eksitoso klínika di futbòl pa mucha muhé. Esaki a tuma lugá djasabra 21 di dezèmber 2019 den Stadion Ergilio Hato na Brievengat.
E klinika tabata pa muchanan muhé ku tin ambishon pa e deporte di futbòl di 12 pa 17 aña di edat. E tabata na enkargo di e entrenadónan di Favela Street Kòrsou, ku ta un proyekto ku a inisiá na kuminsamentu di e aña aki.
E proyekto aki ta yuda muchanan muhé ku tin problemanan sosial den nos komunidat pa bira entrenadó di futbòl. Tambe nan ta siña kon pa organisá aktividatnan deportivo den barionan. Pa medio di esaki e hóbennan ta siña diferente disiplina ku por keda apliká den nan bida diario.
Meta di e klínika ta pa promové i engrandesé futbòl femenino na Kòrsou, pero tambe pa stimulá e kresementu di e aseptashon di futbòl pa mucha muhé na Kòrsou. P’esei mes Favela Street Kòrsou a djòin ku Excellence School i FFK pa organisá e klínika.
Durante e klinika e muchanan muhé a siña diferente téknika di futbòl. Tambe tabatin chèns pa sera konosí ku Ashleigh Weerden, Quinty Sabajo, Kirsten van der Westeringh i Desiree van Lunteren, ku ta 4 futbolista femenino profeshonal di Hulanda. Nan tabatei pa kompartí nan konosementu ku tur ku asistí na e klínika.
