E organisashonnan di futbòl ku no ke Ramiro Griffith mas komo presidente di Federashon Futbòl Kòrsou (FFK), a akseptá e invitashon die federashon pa un reunion general di miembronan (ALV). Nan a disidí esaki durante un reunion riba djadumingu último.
No ta konosí ken ta bai dirigí e reunion ei ku ta otro siman djamars (25 di yüni): Ramiro Griffith of vise presidente Sharetti Bryan. Porsierto ku e klupnan a pasa un moshon di deskonfiansa kontra dje presidente di FFK. Esaki tabata riba 31 di mei i e klupnan a duna Sharetti Bryan enkargo pa tuma tareanan dje presidente over.
Después dje moshon di deskonfiansa a informá tantu Ramiro Griffith komo Sharetti Bryan tokante esaki. E mesun dos miembronan di direktiva di FFK a anunsiá riba 10 di yüni ku nan a firma e statutonan nobo di FFK i notariá esaki tambe. Tambe nan a informá ku na final di yüli ta bai tin elekshon nobo pa direktiva.
Después di e anunsionan aki e klupnan di futbòl a tene e reunion djadumingu último. E dos boseronan Wilfred Isabella i David Heykoop a bisa ku mayoria di miembronan di FFK a atende e reunion. Nan a reuní riba e último desaroyonan den futbòl. Tambe pa nan tuma un posishon riba e futuro di FFK. Un tópiko ku diskutí ariba tabata e posishon i aktitut dje presidente di FFK despues dje moshon di deskonfiansa di 31 di mei komo.
Tambe e miembronan dje klupnan a papia tokante sierto diskrepansa den e statutonan nobo i tokante e elekshon di un direktiva nobo pa FFK. Mas aleu a averiguá si tin miembronan dje klupnan tin aspirashon pa un dje funshonnan den e direktiva nobo, inkluso e funshonnan di presidente i vise presidente.
Finalmente e klupnan a disidi ku nan ta partisipá na e ALV ku direktiva di FFK a yama pa dia 25 di yüni aki.