Dimitri Leon a gana ayera, djamars 24 di aprel 2018, e tradishonal Torneo Oscar Salas. Ela gana den final di Michael Dalnoot, ku a retirá despues di dos sèt pèrdí.
Federashon di Tènis di Mesa Kòrsou (FTMK) atrobe a organisá un torneo pa su miembresía. Esaki tabata Torneo Oscar Salas ku a tuma lugá ayera den Sala Rekreo Irene Moreno na Muizenberg.
E federashon a haña 19 inskripshon aden. A hunga segun e sistema di knockout promé, pa asina yega na 16 hungadó. Despues a sigui kompetensia den 4 grupo di kada 4 hungadó.
Den grupo 1 Raymond ‘Cath’ Cathalina a gana Eric Adamus 3-2, mientras Adamus a gana Lucien Alberg 3-2. Pero komo Alberg na su turno a gana Cath 3-0, e hungadó aki a sigi pa kuarto final.
Den grupo 2 Napi Boekhoudt a pèrdè tantu kontra Ravi Rajwani komo Wilfred Daantje ku skor di 3-2. Pues ela bende su kuero karu promé di keda eleminá.
Den grupo 3 no tabatin niun sorpresa i e dos faboritonan Henny Metry i Raymond Begina sin problema a pasa pa e siguiente buelta.
Den grupo 4 tambe tabata e faboritonan Michael Dalnoot i Giancarlo da Costa ku a pasa p’e siguiente buelta.
E resultadonan den kuarto final tabata: Dimitri Leon vs Giancarlo da Costa 3-0: 11-8, 11-7, 11-5; Sigmar Carmelia vs Raymond Begina 3-0: 11-8, 12-10, 11-7; Henny Metry vs Ravi Rajwani 3-1: 11-8, 11-3, 6-11, 11-4; Michael Dalnoot vs Lucien Alberg 3-0: 11-7, 11-5, 11-5.
Den semi final e siguiente resultadonan a keda registrá: Dimitri Leon vs Henny Metry 3-0: 22-20, 12-10, 11-8 i Michael Dalnoot vs Sigmar Carmelia 3-1: 11-4, 12-10, 4-11, 11-6.
E final entre Dimitri Leon i Michael Dalnoot tabatin un komienso interesanto, pero despues tabatin un desaroyo lamentabel. Despues ku Dalnoot a kai atrás 2-0, e tabatin poko problema ku su kondishon fisiko i asina Leon a titulá kampion dje Torneo Oscar Salas.
