E selekshon di beisbòl di Kòrsou awe, djasabra 8 di dezèmber 2018, a pasa pa final dje promé edishon di Caribbean Baseball Cup. Esaki a sosodé via di un triunfo nòkout riba e tim di Aruba: 12-2. E final ta mañan kontra Repúblika Dominikana.
E kompetensia pa Caribbean Baseball Cup 2018 ta tumando lugá na Repúblika Dominikana. Esaki ta e promé edishon dje kompetensia aki. Un total di seis selekshon ta kompetí. Kòrsou, Perú i Virgin Islands ta den pul A i den pul B tin Aruba, Haiti i Repúblika Dominikana.
Despues ku Kòrsou a gana di Virgin Islands (7-6) i Perú (18-4) den grupo A, awe djasabra e selekshon lokal a sali kontra di Aruba den semi final. Esaki komo ku e tim Rubiano a sali di dos den grupo B. Den e otro semi final Repúblika Dominikana ku a sali promé den grupo B, a hunga kontra Virgin Islands ku a sali di dos den grupo A.
Kòrsou awe kontra di Aruba tabata e tim ku a skor promé. Ku 2 kareda den di dos inen e tim a tuma ventaha den e wega: 2-0. Tur dos tim a skor 1 kareda den nan di tres turno: 3-1. Den di kuater entrada Kòrsou a hinka 4 kareda pa hasi e wega: 7-1.
Despues ku Aruba a bolbe skor 1 kareda den di seis inen, Kòrsou a kontestá ku 2 kareda den bòm di mesun entrada pa despues hinka 3 kareda den di shete inen i nòkout e kontrinkante: 12-2.
Picher Ruderly Manuel a gana e enkuentro pa Kòrsou. Den shete inen di trabou ela pèrmití 2 kareda riba 10 hit. Ela duna tres base por bola i a ponchá 5 batiadó. Di su 107 lansamentunan, 65 tabata straik. Den e 7 inennan ela enfrentá 32 batiadó.
E mihó batiadónan pa Kòrsou tabata Sander Boeldak, Reangelo Beaumont, Shurendell Mujica, Sherman Lacrus i Risandro Pastor. Boeldak a bati 2 hit den 3 turno, empuhá 4 kareda i skor 1. Beaumont taambe a dal 2 hit pero den 4 turno, enpuhá 2 kareda i skor 3 biaha. Mujica, Lacrus i Pastor a bati 1 hit den 2 turno.
E selekshon di Kòrsou ta hunga mañan mainta 10’or final kontra di Repúblika Dominikana.