E selekshon nashonal di futbòl di Kòrsou ta hunga awe djabiènè su promé wega den e siklo di Concacaf Nations League. Promé ku e tim a viahá pa Grenada e direkshon tèkniko a anunsiá ku 5 hungadó a kai afó pa motibu di leshón. Na nan lugá entrenadó prinsipal Dick Advocaat a yama 3 otro futbolista.
E sinku hungadónan ku a kai afó ta Jeremy Antonisse, Kenji Gorré, Jurgen Locadia, Rayvien Rosario i Cherrion Valerius. Esnan ku a remplasá nan ta Shanon Carmelia, Jurich Carolina i Joshua Zimmerman.
Advocaat i mayoria dje futbolistanan ku ta hunga na Hulanda i Europa a yega djamars Kòrsou. E mesun anochi promé minister Gilmar ‘Pik’ Pisas i minister di Deporte Sithree van Heydoorn a bishitá e selekshon na Corendon Mangrove Beach Resort. Nan interkambiá di opinion ku tantu e staf tékniko komo e futbolistanan, i a deseá nan eksito den nan dos weganan na Grenada.
E selekshon di Kòrsou a viaha djarason mainta pa Grenada, kaminda e ta hunga pues awe kontra St Lucia. Tres dia despues, esta djaluna dia 9 di sèptèmber, San Martin (St Maarten Franses) ta e siguiente kontrinkante di Kòrsou.
41 selekshon di futbòl ta kompetí den Concacaf Nations League. E kompetensia ta hunga den tres liga: Liga A, B i C. Kòrsou ta hungá den Grupo B di Liga B. Den e liga’ki ta kompetí 16 selekshon partí den kuater grupo.
Den Grupo A ta hunga selekshonnan dje siguiente paisnan: El Salvador, Montserrat, San Vincent & Grenadines i Boneiru. Den Grupo B ta hunga pues Kòrsou, St Lucia, Grenada i San Martin. Haiti, Puerto Rico, Aruba i St Maarten ta hunga den Grupo C, mientras den Grupo D tin e sigiuente selekshonnan: Repúblika Dominikana, Bermuda, Antigua & Barbuda i Dominica.
