E selekshon di 14 atleta di Kòrsou a konkistá 2 medaya di bròns durante di Carifta Games 2024 na Grenada. Zsa-Zsa Frans den kategoria mucha muhé di 17 aña i mas hóben (U17) i Sdewey Zhuang den mucha homber U20 a gana e medeyanan akí pa Kòrsou.
Frans a kleim su bròns den e disiplina di kareda di 100 meter ku opstakulo den un tempu di 14,21 sekònde. Malayia Deanna di Jamaica a sali promé ku un tempu di 13,63, sigui na di dos lugá pa Jenna Marie Thomas di Trinidad & Tobago den 13,74 sekònde.
Zhuang a terminá e kareda di 110 meter ku opstakulo den un bon tempu di 13,94 sekònde. Den e kareda akí Shaquane Gordon di Jamaica a gana ku un tempu di 13,15, sekònde, miéntras su paisano Daniel Beckford a bira di dos den un tempu di 13,25 sekònde.
Otro atleta di Kòrsou, Zion Sambo, na dos okashon kasi a gana mas bròns. Ku un tempu di 10,80 sekònde riba e sprint (100 meter) el a terminá na di kuater luga. E tabata 0,08 sekònde mas pokopoko ku e ganadó di medaya di bròns Malike Nugent di Jamaica. Den kareda di 200 meter Sambo a drenta na di kuater lugá ku un tempu di 22,23 sekònde. Tiondre Frett di Islanan Virgen Britániko a kleim e bròns den un tempu di 22,18 sekònde.
Además di Sambo, Raminge Laker tambe a kore den final di sprint. Ela registrá un tempu di 11,06 sekònde. Esakí tabata bon pa e di ocho puesto den.
Carifta Games di atletismo a tuma lugá na Saint George, Grenada.