E selekshon di Kòrsou ku ta kompetí den e kampionato pa Caribbean Baseball Cup, a gana su dos promé enkuentronan i pasa mesora pa semi final. Den oranan di mainta ayera, djaweps 6 di dezèmber 2018, e tim a superá Virgin Islands ku skor pèrtá di 7-6 i tra’i mèrdia a vapuliá Perú ku 18-4.
E kompetensia pa Caribbean Baseball Cup ta tumando lugá na Repúblika Dominikana. Esaki ta e promé edishon dje kompetensia aki. Un total di seis selekshon ta kompetí. Kòrsou, Perú i Virgin Islands ta den pul A i den pul B tin Aruba, Haiti i Repúblika Dominikana.
Den e promé enkuentro Kòrsou ku 2 kareda den su di dos turno a bai dilanti (2-0) kontra di Virgin Islands. Sinembargo e kontrinkante ku 1 kareda den di tres i kuater inen a empatá e wega na dos kareda.
Den bòm di kuater entrada Kòrsou ta skor 4 kareda pa bolbe tuma ventaha: 6-2. Den su sigiuente turno (5 inen) e selekshon di Virgin Islands ku 3 kareda a kòrta e ventaha di Kòrsou te na 1 kareda: 5-6. Despues di tres inen sin skor, Kòrsou i Virgin Islands a hinka 1 kareda den respektivamente di 8 i 9 turno pa asina e wega tèrminá 7-6 pa Kòrsou.
Picher Ramses Jamanika a gana e enkuentro. Den di sinku inen ela drenta di relevo pa picher habridó Caroll Servania, ku durante 4,1 inen a pèrmití 5 kareda riba 9 hit. Jamanika den 4 inen a pèrmití solamente 1 kareda i 2 hit. Ruderly Manuel a salba e wega, aunke ku promé ela pérmití 2 hit.
Gianfranco Wawoe a sobresalí na bate ku 1 hit den 2 turno. Ela haña 2 base por bola i skor 2 kareda pa Kòrsou.
Den e di dos wega ayera, Kòrsou a sali hinka 7 kareda kontra di Perú i asina for dje promé inen sigurá e viktoria. E selekshon den su di dos turno a skor 4 kareda pa bai 11-0 dilanti. Perú den bòm di mesun dos inen a hinka 3 kareda i asina bin bèk den wega: 3-11.
Kòrsou sinembargo a bolbe amplia e skor den e sigiuente inennan: 2 kareda den di tres entrada i 5 den di kuater turno: 18-3. Perú a logra skor 1 kareda den di sinku inen i despues di seis inen umpire a base dje regla di nòkout a para e enkuentro na fabor di Kòrsou: 18-4.
Picher Marverich Lourens a gana e wega. Ela drenta den di sinku inen di relevo pa Ronald Bloem ku na su turno den di kuater entrada a relevá picher habridó Ruendy Carolina. Shair Lacrus a salba e wega.
Shurendel Mujica, Sherman Lacrus, Rogier Boeldak, Riandro Pastor, Sander Boeldak i Jonathan Martijn a bati e bala bon pa Kòrsou. Mujica a dal 4 hit den 4 turno, Lacrus tabatin 2 hit den 2 turno i a empuhá 2 kareda i skor 3 kareda. Rogier Boeldak a bati 2 hit den 3 turno, empuhá 3 kareda i skor 2 kareda. Pastor tambe a dal 2 hit den 3 turno, empuhá 2 kareda i skor 2 bia. Sander Boeldak tambe a bati 2 hit pero den 4 turno, empuhá 1 kareda i skor 2. Martijn a kaba ku 1 hit den 2 turno. E hit aki tabata un homerun.
Awe djabièrnè 7 di dezèmber e selekshon di Kòrsou ta liber wardando riba e semi final ku ta kuminsá mañan djasabra. E tim tin ku hunga kontra e selekshon ku sali di dos den pul B.