E talento yu di Kòrsou Lennard Pietersz e aña aki for di 7 di mei ta bai hunga su di dos temporada den Liga Independiente Hapones di beisbòl. Por sierto ku fin di aña pasá e hóben di 23 aña aki a sali hungadó mas balioso (MVP) den e kompetensia di invierno dje liga aki. Ela militá te ku resien den e tim di Warner University Royals Athletics.
Lennard Pietersz ta bini di un famia di beisbòl. E ta yu di Graciela i Eugène Pietersz. For di su 6 aña ela kuminsá hunga beisbòl den e tim di Marchena. Ela bishitá e skolnan di Marnix i SKAIH. Anto for di su 15 aña e mudá pa Merka kaminda e ta biba i studia.
Durante su estudio Pietersz a hunga beisbòl pa entre otro First Baptist Academy, Clarendon College i Western Oklahoma State College (WOSC). Por sierto ku e pelotero profeshonal yu di Kòrsou Andrelton Simmons tambe a bishitá e skol aki den pasado.
Pietersz asta a hasi un try out ku Philadelphia i asta a haña un oferta dje organisashon aki. Sinembargo e pandemia di Covid-19 a surgi i brua su plannan. E orei ela probechá na bishitá Kòrsou i despues di a regresá Merka, ela aseptá un oferta di Baseball und Softball Club Kufstein di Austria. Ela viaha pa e pais aki, kaminda ela hunga beisbòl ocho luna den e tim Kufstein Vikings.
Despues di e temporada eksitoso ei na Austria, Pietersz a bolbe Merka i via di su tio Robert tabatin kontaktonan balioso kaminda ela bai hunga beisbòl na Hapon. Den invierno dje e tabatin un tremendo temporada ku e tim Zenhoren na Okinawa, te ku ela bira hungadó mas valioso dje liga aki.
Di mes tambe diferente dirigente di otro timnan den Liga Independiente di Hapón a haña hopi interes pa Pietersz. Despues di a bolbe Merka, e aña aki ela firma ku e tim The Blades di Hokkaido. Meskos ku aña pasá e ta hunga short stop p’e tim aki tambe.
