Dimitri Leon den maskulino i Josilienne Boekhoudt di Aruba den femenino a titulá kampion dje tradishonal torneo di klup di pinpòn Donic. E kompetensia tabata dediká na Chaleko Davelaar i su ruman muhé defuntu Alice Davelaar.
Federashon Tènis di Mesa Kòrsou (FTMK) ku organisashon dje torneo Donic a habri aña 2020 di pinpòn. E kompetensia tabata den kuadro di selebrashon di Sentro Bario Sta Maria su di 60 aniversario. Chaleko Davelaar ta miembro honorario di FTMK, mientras ku defuntu Alice Davelaar tabata kampion di Kòrsou den kategoria di damas na 3 okashon.
E torneo tabata riba dos dia. Ribe e promé dia a hunga kompetensia habrí pa hungadónan di A-klas, kaminda tabatin 16 inskripshon entre nan 2 hungadó femeninTa trata di hungadónan ku tin hopi bon nivel di wega: Julia Jansen di Hulanda ku ta temporalmente na Kòrsou i e hoben di 14 aña Josilienne Boekhoudt di Aruba. Fo’i Aruba tambe a kompetí Rudy Raga ku ta un hungadó veterano internashonal ku a yega di representá Venezuela na diferente okashon i e hoben prometedor Chin Ho.
Kòrsou tabata represent pa entre otro Dimitri Leon, Ravi Rajwandi, Henny Metry, Raymond Begina, Sigmar Carmelia i Jaysron Mathilda. Gran ousente den e grupo aki tabata Devon Meilink ku ta number 2 rankeá di Kòrsou. Pa motibu personal e no a partisipá.
A hunga den 4 grupo di 4 hungadó, kaminda e mihó dosnan a pasa pa kwart final. Lastimamente Jansen ni Boekhoudt no a klasifika, pero wèl a hunga balente kontra e hungadónan maskulino.
Den grupo 1 Jaysron Mathilda a gana di Dimitri Leon, poniendo esaki klasifika number 2 den su grupo. Dor di esaki ya den kwart final a haña un partido ku lo a verwagté mas lat den e torneo entre Leon i Raga di Aruba. Leon a gana e partido aki.
Di Aruba e ora ey a keda solamente e hoben Ching Ho ku balentemente a gana tur su weganan p’e yega final. Djaya banda Leon tabatin ku bringa duru den semi final pa gana di Ravi Rajwano. Den e partido final Leon ku su eksperensia a gana di e hoben Ching Ho 3-0, bayendo ku e titulo maksimo.
Riba e di dos anochi di kompetensia a toka turno p’e hungadónan femenino. Tabatin 8 inskripshon. Aki si tabata visto, dor di diferensha grandi di nivel, ku Julia Jansen i Josilienne Boekhoudt probabelmente lo te finalistanan,
E final a bira pues entre e Jansen i Boekhoudt ku e ultimo aki bayendo ariba 2-0 den un final di mihó di 5. Jansen a logra bin bèk pa empatá e wega na 2. Den e di 5 sèt kada un dje hungadónan a haña un ‘match point’, pero finalmente tabata Boekhoudt ku ta gana e sèt 14-12 i bai ku e titulo maksimo.
