Fundashon Desaroyo Deportivo Kòrsou (FDDK) i V-Foundation a uni forsa pa huntu sigui desaroyá deporte eskolar aún mas. Fuera dje Weganan Eskolar Interinsular, Kórsou ta bai haña tambe ‘Triple-7 School Games’.
FDDK i V-Foundation awe djaweps 11 di yüli a firma un akuerdo di koperashon ku otro ku e meta pa duna praktika di deporte eskolar un fundeshi mas fuerte den kurikulo di skolnan. Na mes momento ta krea tambe via di skolnan atletanan di nivel haltu, ku alabes ta bira siudadanonan balioso pa komunidat.
Den e kaudro di koperashon entre FDDK i V-Foundation Gersiñio Constansia ku ta kordinadó di deporte eskolar na FDDK a spliká e plan pa e aña di skol nobo. Ta bai tin 9 ramo di deporte ku lo kompeti den aña eskolar 2024/2025 pa por gana i partisipá na Weganan Eskolar Interinsular. E seri aki ta kuminsá na Kòrsou riba dia 13 te ku 16 di mart 2025 ku e deportenan aquathlon i ahedres pa hóbennan di skol di fundeshi i skol avansá i futbol femenino pa esnan di skol avansá.
Mas aleu ta bai tin 6 otro ramo di deporte di kual e skolnan ganadó ta viahá pa Boneiru i Aruba pa kompetí. Ta trata di basketbòl 3×3 maskulino pa hóbennan di skol
di fundeshi, basketbòl 3×3 maskulino pa skol avansá, vòlibòl maskulino pa skol di fundeshi, atletismo pa skol di fundeshi i skol avansá, dodgeball femenino pa skol di fundeshi i dam pa skol di fundeshi i skol avansá.
Direktornan Verney & Sra. Ileana Jansen di V-Foundation di nan parti a splika ku ta for di novèmber 2023 nan ta den negosashon ku FDDK pa inkorporá e projeko Triple-7 den deporte escolar. E plan ta pa hóbenan di skolnan di fundeshi i skolnan avansá haña 7 luna largu durante aña eskolar di 2or pa 5or di atardi entrenamentu den 7 ramo di deporte. Ta bai tin weganan di kualifikashon pa asina 7 skol por partisipá na e promé ‘ School Games’ organisá pa FDDK i V-Foundation den mei i yüni 2025.
Tambe pareha Jansen a informá ku Kenley Jansen atrabes di su fundashon KJ74 ta sòru pa tur material nesesario pa e proyekto Triple-7 i tambe e sobra kategorianan di deporte escolar. Porsierto ku Verney Jansen ta un ruman di Kenley Jansen ku ta closer di Boston Red Sox.
E 7 ramonan di deporte ku ta kai bou di Triple-7 ta bèisbòl/sòfbòl, futbòl, atletismo, natashon/waterpolo, vòlibòl, basketbòl i kickingball. Tambe huntu ku FDDK a yega na akuerdo pa inkorporá dos disiplina di arte ku ta baile i bulamentu di kabuya.
Por ultimo direktor di FDDK Vergilly Winklar a splika ku FDDK a bin ta trahando den koperashon ku vários organisashon, kaminda enbes di pidi fondo ta logra
metanan grandi ku organisashonan manera V-Foundation i KJ74, kaminda ta haña na disposishon materialnan i konosimentu. E ramonan di deporte den kua tin kompetensianan ta organisá pa kwalifiká pa weganan interinsular i outomatikante ta sirbi tambe komo kwalifikashon pa ‘School Games’.
Finalmente Winklar a splika ku pa bini na remarke pa ta enbolukrá na e forma nobo aki di deporte eskolar kolaboradornan mester pasa un kurso kordiná pa FDDK i V-Foundation, pa por haña un lisensia di kolaborador di FDDK. E kurso ta enserá entre otro un tèst fisiko i ta inkluí aspektonan didaktiko, pedagogiko i EHBO.
![](https://storage.googleapis.com/sportcwmedia/2024/07/4094b73a-pic-3-1024x768.jpeg)
![](https://storage.googleapis.com/sportcwmedia/2024/07/0b41903f-pic2-1024x768.jpeg)
![](https://storage.googleapis.com/sportcwmedia/2024/07/16caee12-group-pic1-1024x768.jpeg)
![](https://storage.googleapis.com/sportcwmedia/2024/07/cf188717-pic4-1024x551.jpg)