Tres dia promé ku aña bòltu Federashon di Deporte & Olímpiko di Kòrsou (FDOK) a instalá dies miembro nobo den Salon di Fama. E instalashon ofisial dje baluartenan a tuma lugá den Marriot Hotel na Piscadera. Ku e evento di gala aki e organisashon a klousurá ofisialmente aña deportivo 2020.
Maestro di seremonia durante dje instalashon dje dies baluartenan deportivo den Salon di Fama tabata Alexander Makaya. Monica Mao-Cheia a kanta himno di Kòrsou, mientras ku tabatin invokashon na enkargo di obispu Luis Seco. Tabatin despues diskursó planiá di minister di Deporte Steven Croes i presidente di FDOK Rignaal ‘Jean’ Francisca.
Despues ku meimei di aña FDOK den un seremonia virtual a instalá William ‘Junior’ Millerson den Salon di Fama, riba 28 di dezèmber a instalá e dies sigieunte baluarte nan: Raoul Alias (Dam), Michael Arvelo (Biyar), Marcel Brigitha (Beisbòl), Wilfrido Coffi (Futsal), Philip Elhage (Beisbòl), Magdalena Faneyt (Sòfbòl), Eelco Gonet (Basketbòl), Gustavo de Jongh (Sòfbòl), Erwin Martis (Atletismo) i Ivonne Leito – Senff (Karate).
Awor Salon di Fama di FDOK ta konsistí di 85 baluarte, di kua den transkurso di añanan 37 a muri. E persona ku mas resien a muri tabata Junior Millerson, algun dia despues ku ela keda instalá ofisialmente.
For di aña 1985 a kuminsá ku Salon di Fama. Franklin Mathilda ku tabata presidente e tempu ei di Curaçaose Sport Federatie (CSF) a duna inisio na esaki. E promé baluartenan deportivo ku e aña ei a drenta Salon di Fama tabata: Antoine Maduro, Ergilio Hato, Ernest Smith, Guillermo Haseth, Hector Rosario, Juan Isa, Mordy Maduro, Myrna Anselma, Wilfred ‘Willie’ Pieters i Juan ‘Benny’ Leito. Tur e baluartenan aki entre tantu no ta na bida mas.
FDOK ta e organisashon ku a sigui CSF i ku pues ta enkargá ku e evento di Salon di Fama. E federashon ta presidí pa Jean Francisca. Sobrá miembronan di direktiva ta Efigenio Braafhart (vise presidente), Ranjit Persaud (sekretario general), Aishel Richardson (di dos sekretario general), Nelson Maria (tesorero) i Ruthsel Martina ku ta fungí komo di dos tesorero.
E personanan ku ta forma e asina yamá Komishon di Elekshon Salon di Fama ta: Frank Mathilda, Rafael Josefa, Wendell Prince, Soraida Juliana, Raymond Martha, Melvin Vornis, Rudsel van Lamoen i Cesar Palacios.
