E tim di The Millenials a gana e torneo di ‘billiard challenge’ di Federashon Biyar Kòrsou (Febiko). E hóbennan ku a forma Millenials a derotá nan kontrinkante The Oldies ku skor di 5 pa 3.
E federashon di bilyar di Kòrsou a organisá e kompetensia di biyar den su sentro Pool Arena na Gosieweg. E torneo tabata den kuadro dje Siman Olímpiko di Federashon Deporte I Olímpiko (FDOK).
E torneo di biyar tabata dediká na defuntu Fèko Bernabela. E tabata un hungadó do biyar apashoná i ku tabata konosí pa su bon wega i amor grandi pa e deporte, pero tambe pa su aktitut krítiko i su manera di papia kla ku hende. Prinsipalmente e koleganan mas grandi tin hopi anékdota riba su persona.
E hungadónan hóben di The Millenials a kuminsá e ‘billiard challenge’ riba bon pia ganando e dos promé serinan: 2-0. E tim di The Oldies a gana e seri di wega dòbel i e sigiuente seri pa asina empatá e wega na 2 pa 2. The Millenials atrobe a tuma ventaha (3-2), pero e The Oldies no a laga muchu tempu pasa i a empatá e skor na 3 pa 3.
Despues di esaki The Millenials a bolbe gana i bai dilanti 4 pa 3, pa finalmente tèrminá ku tur ilushon di The Oldies: 5 pa 3.
Porsierto ku tabata Shamir Tremus ku a gana e último seri di wega pa asina seyá e triunfo pa The Millenials. Tremus ta konsiderá komo e mihó hungadó di biyar di Kòrsou i a representá Kòrsou den diferente torneo regional i tambe kampionato mundial.
Riba petishon dje tim The Oldies, The Millenials ta duna esaki un rematch. Esaki ta tuma lugá mas lat e aña aki. Mas eleu Febiko tambe tin plan pa organisá mas wega den e sentro na Gosieweg.
