E di dos dia dje ‘spring training’ den Major League Baseball (MLB) ta tras di lomba. Boston Red Sox, e tim di Xander Bogaerts, a gana su dos weganan ayera djaweps 22 di febrüari 2018. Sinembargo e hungadó di Aruba no a mira akshon.
Boston a gana e promé enkuentro ku skor abultá di 15-2 di Huskies. Kyri Washington a sòru via di un homerun pa 4 dje karedanan aki. E di dos wega Boston a superá Eagles ku skor di 4-2.
Foto Kyri Washington
E otro resultadonan di ayera ta lo sigiuente: Detroit Tigers vs Mocs 6-1, Philadelphia Phillies vs Spartans 6-0 i finalmente Minnesota Twins vs Gophers 2-1.
Awe, djabièrnè 23 di febrüari, tin diferente enkuentro riba programa. Asina Detroit Tigers ta enfrentá New York Yankees di e yu di Kòrsou Mariekson ‘Didi’ Gregorius.
Foto Didi Gregorius
Mas aleu Tampa Bay Devil Rays ta sali kontra e tim di e yu di Kòrsou Jonathan Schoop ku ta Baltimore Orioles. Atlanta Braves di Ozzie Albies tambe di Kòrsou ta topa New York Mets. Chicago White Sox ta hunga kontra di Los Angeles Dodgers dje as relevista yu di Kòrsou Kenley Jansen. Anaheim Angels of Los Angeles di Andrelton Simmons di Kòrsou ta topa Oakland Athletics. Milwaukee Brewers ta hunga kontra di San Francisco Giants ku tin Hensley Meulens komo ‘bench coach’.
E otro weganan ta: St Louis Cardinals vs Miami Marlins, Washington Nationals vs Houston Astros, Minnesota Twins vs Boston Red Sox, Pittsburgh Pirates vs Tampa Bay Devil Rays, Philadelphia Phillies vs Toronto Blue Jays, Chicago Cubs vs Milwaukee Brewers, Cincinnati Reds vs Cleveland Indians, Seatle Mariners vs San Diego Padres i Arizona Diamondbacks vs Colorado Rockies.