Kòrsou aktualmente ta anfitrion di 14th World Domino Championship. E kampionato mundial ta tuma lugá den World Trade Centre (WTC) na Piscadera i ta konta ku partisipashon di hungadónan di domino for di kasi tur kontinente.
Entre 300 pa 350 hungadó di domino di 15 pais ta kompetiendo den sala di ekshibishon di WTC. Tin kompetensia individual i tambe pa ekipo. E partisipantenan ta femenino i maskulino.
E 14th World Domino Championship 2017 ta konta ku e sigiuente patrosinadónan: gobièrnu di Kòrsou, Curaçao Tourism Board (CTB), Curoil, Copa Airlines, Citizens Insurance, Hilton Curaçao, Clarion Hotel & Suites i WTC.
E komishon/direktiva organisadó lokal dje di 14 edishon di World Domino Championship ta konsistí di presidente Wilfred Rondei, vise presidente Jeanmark Welvaart, tesorero Raneiry Nahr, sekretario Gladwin Sparen, segundo tesorero Djuric Morales i komisarionan Curly Jansen i Gilbert Merenciana.
E kampionato ta tuma lugá bou di supervishon di Federación Internacional de Domino (FID). E organo aki tin Lucas Guittard komo presidente, Oscar Navarro ta fungí komo vise presidente, Manuel Oquendo ta tesorero i Dulce Ruiz ta sekretario general.
E kampionato mundial di domino a kuminsá djamars ku su kongreso i elekshon, siguí djarason ku un kurso di arbitro i registrashon i den oranan di atardi pa anochi tabatin apertura ofisial ku un parada riba Plasa Brion. Riba djaweps a kuminsa ku kompetensia di domino pa pareha i individual ku a kontinuá awe djabièrnè. Mañan djasabra ta último dia di kompetensia.
E kampionato mundial di domino ta konta ku un bolsa di premio efektivo di 40.000 dollar. Tantu kampion individual komo tim kampion ta bai kas ku 5.000 dollar, miéntras ku e supkampion den tur dos kategoria ta gana 3.000 dollar i e terser puestonan tin 2.000 dollar reservá. Demas puestonan tambe tin premio efektivo garantisá.
