Pòrtret nan pintá di vários strea di beisbol lokal ta bria riba e muraya na sur di Johnny Vrutaal Stadion, mihó konosí komo Stadion di Rif. Fundashon Desaroyo Deportivo Kòrsou (FDDK) tabatin ayera, djaluna 24 di yüni, desvelo dje asina yamá ‘Wall of Fame’ akí.
E mural ta sirbi komo un homenage na streanan di beisbol lokal. Además e ta un sorto di vitrina pa duna bon bini pa turistanan i na mes momento introdusí esakinan na Kòrsou i parti di su pueblo. E stadion ta situá enfrente dje terminal di barkunan krusero, esta Megapier.
E intenshon dje mural ta tambe pa hendenan lokalnan di mes por gosá dje proyekto artístiko aki. Prinsipalmente e generashon mas hóben asina por siña konosé mihó nos heroenan di beisbol. Den e kuadro aki FDDK ta sperá ku e mural ta un fuente di inspirashon pa hóbennan, pa asina sigui nan soño i ku dedikashon i esfueso logra esaki den futuro.
E ‘Wall of Fame’ ta konsisti di pòrtrètnan di 21 hungadó di beisbòl, pero tambe di mayornan di Kòrsou ku a nase i biba na Hulanda ku ta hungando òf a hunga den Major League Baseball (MLB). MLB ta e liga profeshonal di bèisbol na Merka.
FDDK a bin ku e ‘Wall of Fame’ den un estrecho kolaborashon ku e sektor komersial lokal. Asina ta ku FirstCaribbean Bank promé ku ela stòp su aktividatnan bankario na Kòrsou, a duna un kontribushon balioso na e proyekto akí.
Na e desvelo dje proyekto ‘Wal of Fame’ di FDDK, tabat’ei minister di Deporte Sithree van Heydoorn (MFK), algun miembro di Parlamento, famianan di nos streanan di beisbol, spònsernan i algun invitado speshal.
