Wild Cats a gana awe, djamars 17 di ougùstes, atrobe di Sta Maria Pirates. E biaha’ki e wega a kaba ku skor di 11-9. Djadumingu e Pushinan Brabu a derotá e Piratanan ku ku skor di 17-6.
Federashon Beisbòl Kòrsou (Febeko) a sigui awe ku e kampionato lokal den Parke Tio Daou na Sapaté, despues ku ayera tabatin wega den Stadion Johnny Vrutaal den Otrobanda.
Por sierto ku den e wega di ayera djaluna 16 di ougùstes Sta Rosa Indians a gana ku skor pèrtá di 6 pa 5 di Royal Scorpions. Un dia promé, esta djadumingu, tambe e mesun dos timnan aki a topa otro, ku e ekipo di Sta Rosa ganando ku skor di 10 pa 6.
Despues di a gana Sta Maria Pirates djadumingo ku skor konvinsente di 17 pa 6, awe tambe Wild Cats tabata superior ganando ku skor di 11 pa 9. Porsierto ku e Pushinan Brabu a seya e viktoria for di trempan dor di skor 11 kareda den e promé dos inennan.
E Piratanan a hasi tur esfuerso pa bini djatras, pero a kai kòrtiku. E tim di Sta Maria a skor 1 kareda den su promé turno na bate i despues kada bes 2 kareda den di dos, di tres, di seis i di shete inen.
Picher Shurensley Daantji a gana e wega pa Wild Cats, miéntras ku Claycandy Hariquez a sufri e derota. Daantji a drenta di relevo den di kuater inen i a pèrmití 4 kareda riba 6 hit. Ela ponchá tres batiadó di Sta Maria.
Tabatin 4 homerun den e wega. Denzel Gregg i Johannes Gregorius Jr a saka e bala for di Parke Tio Daou pa Sta Maria, miéntras ku Randolph Kirindongo i Rojean Cleofa a hasi meskos pa Wild Cats.
