Peter Wong di forma kombinsente a gana Torneo Barberia Cinto. Ela hasi esaki superando presisamente Jacinto Zimmerman ku e kompetensia tabata dediká n’e. Wong a gana tur su weganan.
Torneo Barberia Cinto tabata destiná pa hungadónan 50+ master. E dedikashon na Zimmerman tabata relashoná ku esaki su selebrashon di 55 aña komo barbero stelista.
Un kantidat di 20 hungadó master di e edat di 50 aña i mas a kompetí den e torneo. A hunga e prome 40 weganan dje bueltanan klasifikatorio mihó di 3.
Den e bueltanan preliminar Giovanny Silonero ku resientemente a bira kampeon di B klas, a logra un triunfo impreshonante riba un dje faboritonan: Hensley Wentwoord. Silonero a gana pèrtá 2-1 ku parsialnan 14-12, 6-11 i 17-15. Tambe ela gana otro hungadó di A klas den su grupo ku ta Raymond Cathalina.
E úniko hungadó femenino den e torneo, Mary Ann Mac Cleod, a klasifiká pa kwart final, ora ela tèrminá na di 2 luga den su grupo. Esnan ku a sa di pasa pa kwart final tabata: Giovanny Silonero, Hensley Wentwoord, Peter Wong, Mary Ann Mac Leod, Lucien Alberg, Eric Adamus, Raymond Begina i Jacinto Zimmerman.
E resultadonan notable tabata kon fasil Zimmerman a gana Silonero den tres sèt, mientras tambe ku e faboritonan grandi Begina a topa Wentwoord ku e promé saliendo komo vensedor.
