Despues di a sufri un derota na inisio dje kampionato di sòfbòl femenino fast pitch, Pichingolo KIA/Nissan a gana tur su sigiuente weganan enkuentronan den Liga MCB. E tim sup kampion di Kòrsou asta a tuma revancha riba Sta Rosa Angels Vanddis, kibrando esaki su invikto.
E kampionato organisá pa Federashon Sòfbòl di Kòrsou a kontinuá den wiként ku vários wega den Sabana Ballpark, Buena Vista Ballpark i Montab Ballpark.
Pichingolo a sali brabu kontra di Sta Rosa Angels, anotando 8 kareda den promé inen pa asina triunfá finalmente ku skor di 8-3. Esaki tabata e promé derota pa e kampion di Kòrsou.
Picher Suheydi Faneyt di Sta Rosa no tabatin su mihó dia riba montíkulo. Ela a pèrmití 5 kareda i 6 hit. Dianne Rosa ku a relevá tampoko no por a kontrolá e bateadónan di Pichingolo, pèrmitiendo 3 kareda i 3 hit. Finalmente tabata Janiska Franklin ku a drenta i paga e kandela, tirando 5 inen sin pèrmiti mas kareda na Pichingolo.
Picher ganadó a resultá Arnalda Margaritha. Su kolega di tim, Chantal Nepomuceno, tabatin un anochi perfekto na bate. Ela bati 3 hit den 3 turno (3-3). Suheydi Faneyt tabata e picher pèrdèdó, miéntras ku Sueny Felicia a dal 2 hit den 3 turno (3-2).
Pichingolo KIA/Nissan a kontinuá ku su racha di viktoria, ganando ku skor di 7-0 di Nos Tei Curaçao Office Supply. E sup kampion di Kòrsou tabata 9-0 dilanti den e wega, ora ku e tim di Nos Tei a ninga di sigui hunga i pesei umpire a tèrminá e enkuentro i ofisialmente duna Pichingolo ganá: 7-0.
Den otro wega Demolition Cartel NV a sufri un derota humiante serka Sta Rosa Angels Vanddis: 1-21. Eagles Softex tambe a gana di Demolition ku skor di 13-1.
