Pichingolo Nissan ayera’nochi, djabièrnè 28 di sèptèmber 2018, a klasifiká pa otro final den divishon máksimo di sòfbòl femenino. E tim a gana ku skor di 9-2 di Eagles Softex den e di tres alabes último wega di semi final i awor ta bai hunga final kontra Sta Rosa Angels Vanddis.
E ‘play-off’ den divishon dòbel A di sòfbòl femenino di Curaçaose Softball Bond (CSB) a sigui ayera den Buena Vista Ballpark. Un bon públiko a haña kaminda p’e parke di sòfbòl pa asina wak e wega desisivo di semi final entre Pichingolo i Eagles.
For di e promé inen Pichingolo a disidí e enkuentro ora ku ela skor 3 kareda kontra di picher Richella van Gennip, ku porsierto un dia promé a dominá e multiple kampionnan 1-0 pa empatá e seri prefinal. Ayera e no tabata mesun efektivo, miéntras ku defensa di su kompañeronan tambe a lag’é na kaya.
Den di dos inen Pichingolo a hinka 2 kareda mas pa tuma ventaha kómodo di 5-0. Tabata bisto ku e tim bou di direkshon di Taffy de Jongh tabata desidido i riba kaminda pa klasifiká pa otro final.
Fanátikonan di Eagles a haña poko speransa, ora ku den bòm dje di dos inen e ekipo a hinka 2 kareda. Esaki tabata produkto di un homerun ku un koredó na base, ku a hasi e wega 2-5. Sinembargo esei a resultá tur kos pasobra picher Arnalda Margaritha no a pèrmití nada mas i ku bon defensa di su koleganan a saka algun bunita out. Brabu manera Pichingolo a kuminsá e wega, ela kaba esaki tambe anotando mas kareda: 9-2.
Pichingolo awor ta hunga den final kontra di Sta Rosa Angels ku for di prinsipio a klasifiká mesora p’esaki. E promé wega ta planiá pa tuma lugá mañan atardi, djadumingu 30 di sèptember, pa 6’or den mesun Buena Vista Ballpark.
