Pichingolo ta sigui gana den e kampionato di sòfbòl femenino dòbel A. E tim kampion di Kòrsou a bolbe triunfá riba Sta Rosa Angels, e biaha’ki ku skor di 8 pa 2. Esaki ta su di 11 triunfo den 12 wega.
Curaçaose Softball Bond (CSB) a sigui ku kompetensia den dòbel A den Liga MCB djaweps i ayera djasabra. E weganan a tuma lugá den Sam Bunting Ballpark.
Pichingolo ayera tabata superior atrobe riba Sta Rosa Angels. E picher Julise Koffy a gana e wega. Ela sobresalí na bate tambe ku 2 hit den 3 turno.
Mas aleu Kimberly Agard i Moësha de Paula tabatin un anochi perfekto na bate. Tur dos a dal 2 hit den 2 turno. Finalmente Solivieny Scharbaai tambe a lusi den kaha di bateo pa Pichingolo ku 2 den 3 turno.
Picher Janiska Franklin a sufri e derota. Maria Bentura i Ruthshaina Henriquez kada un a bati 1 hit den 1 turno. Tisaira Ustatio Francisca tambe a dal 1 hit pero den 2 turno.
Pichingolo ketu bai ta okupá e promé puesto riba tabla di posishon ku 11 wega ganá i 1 derota. Esaki tabata kontra dje tim supkampion Souax.
Fenix a konsolidá su posishon tras di Pichingolo riba e tabla di posishon ganando tantu djaweps komo ayera djasabra. E tim tin awor 9 viktoria kontra 3 derota.
Djaweps Fenix a gana ku skor di 6 pa 1 di Sta Rosa Angels ku e aña’ki no tin su mihó temporada. Picher ganadó tabata Danela Gonzalez Fanjul, mientras ku Stepheny Elsbeth tabata mihó batiadó ku 1 hit den 1 turno.
Fenix ayera djasabra a derotá The Fighting Team 5 pa 1. Picher Suheydi Faneyt a gana e wega. Cinthia Candela Escalante i Suheydi Faneyt kada un a dal 1 den 1 turno na bate, miéntras ku Deidra Da Costa Gomez a kaba ku 2 hit den 3 turno.
