Sta Maria Pirates a sali hopi brabu den e kampionato nobo di beisbòl AA ku ta dediká na èks pelotero Benigno ‘Bèncho’ Imperator. E Piratanan a gana nan dos promé weganan ku skornan di 7-5 i 16-10 di Wild Cats.
E kampionato 2020 ta organisá pa Federashon Beisbòl di Kòrsou (Febeko) ku tin un direktiva nobo. E kompetensia ta patrosiná pa Aqualectra, Lovers i Aziza Uniforms.
E promé dos weganan dje kampionato nobo di beisbòl a tuma lugá den Stadion Johnny Vrutaal na Rif, Otrobanda. Por sierto ku un bon públiko a haña kaminda pa stadion pa asina disfrutá dje komienso dje kompetensia.
Sta Maria Pirates den e promé wega djasabra a gana ku skor di 7-5 di Wild Cats. Tabata un enkuentro ku di kuminsamentu te final tabata hopi emoshonante. Djadumingu tambe e Piratanan a triunfá riba mesun Pushinan Brabu: 16-10.
Komo ‘Player of the series’ a sali Juremi Profar. Ela kaba e seri ku 4 hit den 8 turno na bate. Ku su hitnan ela yuda hinka 4 kareda. E premio aki ta patrosiná pa Fridays Baby Truck.
E kampionato di beisbòl AA ta sigui awe i mañan anochi ku atrobe un serie di dos wega. Esaki ta entre Sta. Rosa Indians i Marchena Braves. E enkuentro di awe ta de Tio Daou Ballpark, miéntras ku mañam ta hunga den Stadion Johnny Vrutaal.
Direktiva nobo di Febeko ta kòrda tur fanátiko riba e asina yamá ‘Fan Season Pass’ i tambe ‘Team Season Pass’ ku e tin disponibel. Pa mas informashon amantenan di beisbòl por bishitá página di Facebook i/òf Instagram Baseball Curaçao Febeko.
