Raywendley van Gurp di Royal Scorpions a resultá hungadó mas balioso dje kampionato di beisbòl dòbel A 2019, ku no a konkluí e aña’ki. Yurendell de Caster di Wild Cats a gana e premio di kampion bate, miéntras ku komo mihó pichernan a tèrminá Kennimar Martina tambe di Wild Cats i Ramses Jamanika di Royal Scorpions.
Eks presidente di Federashon Beisbòl Kòrsou (Febeko) Micheline Heyliger i su komitiva a organisá e premiashon dje hungadónan ku a sobresalí. Esaki a tuma lugá den edifisio di SVB.
Promé ku e kampionato 2019 a tèrminá, Micheline Heyliger a entregá su retiro. Despues di esaki e kompetensia a keda kanselá. Apesar di e kanselashon aki, e èks presidente a kumpli di su parti premiando e hungadónan ku a sobresalí promé ku e kanselashon dje kampionato, kaminda a skohe Raywendley van Gurp komo Most Valuable Player (MVP).
Yurendell de Caster tabatin un averahe di 471 punto. Esaki ta produkto di 49 hit den 104 turno na bate. E tabatin 32 single, 9 doblete, 1 tripel i 7 homerun, miéntras ku ela empuhá 38 kareda i skor 32.
Kennimar Martina tabata e picher ku mihó averahe di kareda limpi pèrmití, esta 2.28. Ela pichá 39,1 inen, gana 5 wega i no a pèrdè. Kontinkrantenan a skor 12 kareda kontra dje, di kua 10 ta limpi. Mas aleu nan a dal 21 hit i ela ponchá 47 batiadó.
E picher ku mihó aktuashon tabata Ramses Jamanika. Ela pichá 63 inen, gana 7 wega i pèrdè 4. Su averahe di kareda tabata 3.00. Ela pèrmití 31 kareda di kua 21 tabata kareda limpi. E batiadónan kontrali a dale 66 hit, miéntras ku ela ponchá 41.
Tres hungadó a bati 7 homerun promé ku kanselashon dje kampionato. Esakinan tabata Yurendell de Caster di Wild Cats, Raywendley van Gurp di Royal Scorpions i Jonathan Martijn di Marchena Braves.
Den klase A di Febeko tabata Henkie Pinedo di Groot Kwartier Stars ku a gana e premio di hungadó mas balioso. Otro hungadónan ku a sobresalí den e divishon aki ta: kampion bate Shaquille Serberie di Wild Cats ku averahe di 429, pichernan Ghionello Jansen di Sta Rosa i Christen Lasten di Royal Scorpions. Jurickson Fecunda ku 4 homerun a gana e premio di kampion honronero.
