E selekshon di sòfbol femenino di Kòrsou a gana su promé wega den Juegos Centro Américano y del Caribe (CAC) na El Salvador. Esaki tabata danki na di tremendo trabou di picher J’Dah Girigorie ku no a pèrmití kareda na Centro Caribe Sports pa asina guia Kòrsou na un triunfo di 1-0.
Despues di a pèrdè e wega inisial via di nòkout kontra di Cuba (11-1), Kòrsou pues den su di dos kompromiso a sali viktorioso aya na El Salvador.
Te ku e di kuater inen niun dje timnan a skor. Kòrsou den su di sinku turno na bate a habri e skor anotando tambe e úniko kareda dje wega. Esaki tabata produkto di tres base por bola i un hit.
Dje 5 hitnan ku Kòrsou a bati, 2 tabata di dje hóben Thaíma Maximiliana den dos turno. Ela salí tambe e mihó batiadó. Anaïs Piar atrobe tabatin un bon dia na plato ku 1 hit den 1 turno. Ela haña dos base por bolas.
J’Dah Girigorie tabatin awe un tremendo aktuashon riba monttíkulo. Ela bai 7 inen i pues no a pèrmití kareda, pero wèl 5 hit. Ela ponchá un total di shete dje 26 batiadónan ku ela topa. E tabatin 98 lansamentu.
Awe Cuba a logra su di dos viktoria derotando Mexico ku skor tambe di 1-0. Mas aleu Puerto Rico a triunfá ku skor di 9 pa 5 riba Venezuela. E próksimo wega di Kòrsou ta mañan djamars kontra di Mexico ku meskor ku Kòrsou tin 1 wega ganá i un pèrdí.
