Presidente di Confederación de Ajedrez por las Américas Darcy Lima di Brazil ta bai tei presente na Kòrsou pa Carifta Junior Chess Championships 2019. Entre tantu e kampion mundial di ahedres Magnus Carlsen di Noruega a bishitá Kòrsou i traha un video promoshonal kòrtiko p’e evento internashonal aki.
Tal manera anunsiá anteriormente, Kòrsou ta anfitrión dje di 8 edishon di Carifta Junior Chess Championships. E kampionato karibense di ahedres aki ta tuma lugá di 18 pa 23 di aprel den Hilton Beach Resort.
Un total di 10 federashon di ahedres di islanan den Karibe a konfirmá nan partisipashon na e kampionato hubenil di ahedres pa region di Karibe. Esaki ta 2 federashon mas tantu ku a kompetí aña pasá na Surnam. Ta bai tin ahedresistanan di Antigua & Barbuda, Aruba, Bahamas, Barbados, Bermuda, Guyana, Trinidad & Tobago i di mes Kòrsou.
Relashoná ku organisashon dje Carifta Junior Chess Championships aki, Kòrsou ta hañando atenshon internashonal. Asta e kampion mundial di ahedres Magnus Carlsen a bishitá Kòrsou pa disfrutá di un fakansi tropikal. Ela mihó hungadó dje deporte noble aki a disfrutá 2 siman aki. Ela keda den Hilton Beach Resort, ku por sierto ta kas ofisial dje evento deportivo internashonal.
Direktiva di Federashon Ahedres Kòrsou (Fedako) ku ta organisá e kampionato di Karibe, a risibi Magnus Carlsen kordialmente. Den e kuadro di su fakansi na Kòrsou, e kampion mundial a traha un video kòrtiku pa promové e kompetensia. Tambe ela bishitá durante su estadia aki entre otro klup di ahedres Nacho Moron i a hunga tambe. Ela bandoná Kòrsou satisfecho i kontentu riba djamars 26 di febrüari.
Entre tantu Fedako a haña notifikashon ku den kuadro dje di 8 edishon di Carifta Junior Chess Championships, presidente di Confederación de Ajedrez por las Américas Darcy Lima di Brazil lo bishitá Kòrsou. E ta pues invitado di honor durante e kampionato regional aki. Falta 33 dia promé ku e kompetensia ranka sali.
Pa organisashon di Carifta Junior Chess Championships 2019 Fedako a haña patrosinio di ministerio di Eseñansa, Siensia, Kultura i Depiorte di gobièrnu, Maduro & Curiel’s Bank (MCB), Refineria di Kòrsou (RdK), Banco di Caribe (BdC), Seaquarium Park Curaçao i Stichting Johannes Bosco. Sin nan patrosinio e kampionato lo no tabata posibel na Kòrsou.
Pa mas informashon públiko general i amantenan di ahedres hubenil por klek riba www.curacaochessfederation.com.