Alexander Rodriguez di Sta Maria Pirates djabièrnè, 2 di ougùstùs 2019, a gana e asina yamá homerun derby di beisbòl dòbel A. Den klase A e mihó batidó di homerun a resultá Jegveny Hendrik di Wild Cats El Consolador/KJ74.
Federashon Beisbòl Kòrsou (Febeko) a tuma un pousa den e kompetensianan regular manera ta kustumber, pa asina organisá e evento di homerun derby. Esaki a tuma lugá den Stadion Johnny Vrutaal na Rif, Otrobanda.
E hungadónan ku a inskribí pa kompetí den dòbel A, esta den Liga Aqualectra, pa e korona di kampion bati homerun, tabata: Randolph Kirindongo i Rojean Cleofa i reserva Levi Carolus di Wild Cats, Johannes Gregorius, Ulrich Snijders i Alexander Rodriguez di Sta Maria Pirates, Rogier Boeldak, Aldair Adamus i reserva Juremi Fornerino di Groot Kwartier Stars, Ludwin Obispo i Issachar Pereira di Fire Birds, Hershelon Juliana i Swindly Lint di Sta Rosa Indians.
Den klase A e sigiuente batiadónan a mèldu pa e kompetensia di bati homerun: Jegveny Hendrick di Wild Cats, Jair Jakob di Fire Birds, Franklin Felix di Sta Maria Pirates, Randall Rog di Sta Rosa Indians, Aldo Jansen di The Champs, Yurdion Martie i reserva Henki Pinedo di Groot Kwartier Stars. Rochandi Illidge di Suffisant i Yorick Henson di Royal Scorpions.
