Shuatanari ayera, djarason 24 di aprel 2019, a titulá kampion femenino den divishon A di Federashon Vòlibòl Kòrsou (Fevoko). E tim kòrá patrosiná pa Lab de Med a gana e di dos wega final tambe di Xaverianen.
E enkuentro entre Shuatanari i Xaverianen tabata e úniko den sala Errol Rooi di Sentro Deportivo Kòrsou (SDK). E fanátikonan a presensiá un bon wega entre e dos finalistanan.
Apesar ku e wega final number 2 a transkurí basta pareu, tabata Shuatanari ku kada bes tabatin e mihó wega. E tim di Xaverianen a duna bon bataya, pero tabata falta eksperensia den toke final. Shuatanari a gana ku parsialnan di 25-20, 25-22 i 25-14.
Mesora despues dje enkuentro, tabatin entrega di premio na tantu Shuatanari komo Xaverianen.
E kampionato di Fevoko ta sigui djadumingu awor ku dos wega di semi final den divishon superior. Den kategoria femenino Shuatanari i Hurricane ta hunga nan di dos wega. Shuatanari a gana e promé enkuentro. Den kategoria maskulino Xaverianen i Stakamahakchi tambe ta hunga nan di dos wega ku Stakamahakcha dilanti 1-0 den e seri aki.
