Shuatanari den divishon máksimo femenino sigui pa Xaverianen den divishon máksimo maskulina a pasa ya kaba pa final. Nan ta warda awor riba nan próksimo kontrinkantenan.
Federashon Vòlibòl Kòrsou (FeVoKo) a ranka sali riba djadumingu 22 di yanüari ku e weganan di playoff den divishon máksimo. E serinan aki ta tumando lugá den Sala Errol Rooi di Sentro Deportivo Kòrsou (SDK) den Brievengat.
Den femenino Shuatanari a gana tambe su di dos wega di Jumping Jewels pa asina pasa komo promé tim pa final. Despues di a pèrdè e dos promé sètnan ku 22-25 i 10-25, Jumping Jewels a gana e di tres sèt pèrtá ku 25-22 pa asina forsá un di kuater sèt.
Shuatanari a bin bèk fuerte den e di kuater sèt ei ganando ku skor di kombinsente di 25-13. Esaki a nifiká tambe ku e tim a seyá no solamente e triunfo (3-1) pero tambe su klasifikashon pa e final den divishon máksimo femenino. Porsierto ku Shuatanari ta ketu bai invikto den e kompetensia nashonal.
E otro seri den divishon máksimo femenino ta empatá na 1-1. Despues di a pèrdè e promé wega, Watekeli a gana e dos enkuentro kontra e tim di Stakamahakchi ku skor di 3-1 forsando pues un di tres wega. E parsialnan tabata 25-13, 27-25, 18-25 i 25-18.
Den divishon máksimo maskulino Stakamahakchi ku a perde e prome wega dje semi final, a sali super konsentrá den e prome sèt dje di dos enkuentro. E tim i Xaverianen a brinda e públiko presente un hopi bon wega. Ningun di e dos ekiponan no ta por a tuma un bentahe grandi riba otro despues ku ambos ekipo a pasa 10 punto. E prome sèt bringá a terminá 34-32 pa Stakamahakchi.
Xaverianen konsiente ku Stamahakchi ke forsa un di tres wega, ta sali duru den di dos sèt i pika 7-1 dilanti. E tim no a entrega e bentaha aki mas i a gana e set fasil ku 25-10.
Ku e skor pues 1-1, Stakamahakchi a kai den otro i ta pèrdè e sigiuente dos sètnan ku skor 21-25 i 20-25. Xaverianen asina a bira e promé tim den divishon máksimo maskulino ku a pasa pa final. E otro semi final ta entre Warwaru i Watakeli. E seri aki ainda no tin ganadó.
