RKSV Scherpenheuvel, den boka di pueblo Skèrpènè, ayera -djabièrnè 1 di yüni 2018- a gana di Union Deportivo Bándabou: 1-0. Esaki tabata den kontinuashon dje play-off den Liga MCB, mihó konosí komo ‘Kaya 6’.
E kampionato di Kòrsou den promé divishon di Federashon Futbòl di Kòrsou (FFK) a hunga dos buelta preliminar i awor ta den su promé etapa di weganan pre-final. Despues di ‘Kaya 6’ ku ta un play-off entre 6 tim, ta sigui ‘Kaya 4’ ku ta un seri entre e mihó 4 ekiponan ku a sali fo’i ‘Kaya 6’.
E enkuentro entre Skèrpènè i Undeba tambe a tuma lugá den Stadion Ergilio Hato di Sentro Deportivo Kòrsou (SDK) na Brievengat. E úniko gol dje wega a kai den e promé tempu. Esaki tabata un outogol na di 27 minüt dje futbolista Judreny Jansen di Undeba.
E kompetensia den ‘Kaya 6’ ta sigui awenochi den Stadion Ergilio Hato. E tim di Vriendschap Eendracht Sterken Tegen Alles (VESTA) ta hunga kontra di CVV Willemstad, mihó konosí komo Inter Willemstad. E enkuentro aki ta programá pa kuminsá 8’or.
Mañan djadumingu tambe tin wega den ‘Kaya 6’. Esaki ta kuminsá 6’or tambe den Stadion Ergilio Hato. Aktual kampion di Kòrsou Centro Dominguito ta hunga kontra Jong Holland ku a sali kampion dje bueltanan preliminar.
