Tres hungadó di sòfbòl femenino lokal a viahá resientemente pa Italia i ta hungando pa e tim Nuoro Banco di Sardegna. Ta trata di Kimberley Agard, Julise Koffy i Jandely Ricardo. Nan tim ta hunga den Serie A1 i ta konsistí di algun sòfbolista di Merka i sobrá di Italia mes.
Koffy i Ricardo via intermediashon di Janiska Franklin ku tambe ta gran hungadó lokal di sòfbòl, Koffy i Ricardo a viahá pa Italia. Mas lat e tim Nuoro Banco di Sardegna a tuma kontakto ku Agard, ku despues tambe a subi avion rumbo pa Italia.
Por sierto ku Agard tabata un dje nominadonan pa e premio di deportista femenino senior pa aña 2021. Curaçaose Softball Bond (CSB) a manda e hungadó di Souax Gill’s Sport su nòmber aden. Tabata sinembargo Marie-Antoniette Keli ku a bira mihó deportista femenino di 2021.
E tim Nuoro Banco di Sardegna ta karga nòmber dje provinsia Nuoro, ku ta situá na e isla italiano Sardinia. E munisipio tin 36.347 habitante. E tim ku e yunan di Kòrsou ta militá aden tin kasi 20 aña ta hunga den Serie A1.
E sòfbolistanan lokal ta entrená kasi tur dia i tambe hunga weganan di kampionato. Nan ta keda inisialmente 5 luna na Nuoro. A base di nan prestashon ta disidi ku nan ta sigui ku e tim òf pasa pa otro ekipo òf regresá bèk Kòrsou.
Anteriormente Leonella Elizabeth a hunga vários aña sòfbòl na Oropa, tantu na Hulanda komo Italia tambe. E tabata asta picher estelar di selekshon Hulandes ku a bira kampion di Oropa. Tambe ela hunga den kampionato di Kòrsou pa entre otro Sta Rosa Angels Vanddis, ku ela guia na e titulo kampionil.
