Soraida ‘Aida’ Juliana (56) ku ten su ten tabata un super strea den sòfbòl lokal i asta a marka pouta riba plano internashonal, ta haña ku tin ku duna mas rekonosimentu na deportistanan femenino. E tambe ta selebrá awe Dia di Mama pasobra 25 aña pasá, riba dia 1 di òktober di aña 1991, ela duna lus na un yu hòmber: Elson ‘Sòntje’ Hooi, ken a krese i bira un talentoso futbolista profeshonal.
Manera ta ayera Aida Juliana ta kòrda su infansia yená ku deporte: “Mi tabata gusta hunga beisbòl ku bala di tènis ku mi rumannan homber na kas. Anto rumannan Clarck ku no tabata biba masha leu for di nos, tabata pasa hunga beisbòl ku nos ora ku nan tabatin ku bai tienda.”
Riba un dia Aida Juliana a kambia kurá di kas pa vèlt di bala. “Tabata un dia ku Sylvia Clarck a bini tienda ku su uniform di Pichingolo nèchi bistí despues ku ela kaba di hunga sòfbòl. Mi a bis’é ku mi ta interesá pa hunga sòfbòl i Sylvia a invitá mi pa ban vèlt di Buena Vista. Ami huntu ku mi bisiña Merelin Windevelt a bai vèlt i asina nos a kuminsá hunga sòfbòl.”
Asina Aida Juliana a pone pieda pa un karera impreshonante den sòfbòl. Na 1973, na edat di apenas 13 aña, ela drenta e ekipo Pichingolo kual porsierto e mesun aña ei a keda fundá. Na 1975 ela kompetí den klase A pa despues sigui hunga for di 1976 den klase AA te ku dia ela retirá. Despues ela pasa pa bira entrenadó den beisbòl pa mucha, esta little league, i a biaha ku diferente selekshon pa eksterior.
Komo sòfbolista Aida Juliana a militá den diferente selekshon Antiano i pues a kompetí den varios kampionato internashonal. Vários ta e premionan individual ku ela gana tantu lokal komo internashonal manera kampion picher, kampion bate i hungadó mas balioso. Fuera di tambe diferente distinshon manera entre otro Deportista di Aña Senior 1988 i ganadó di Laurel di oro 1995, na 2009 ela drenta Salón di Fama di Kòrsou.
Aida Juliana durante Weganan Sentro Amerikano i di Karibe na aña 1988, a sobresalí mas ku tur otro. Ela sali number 1 den kasi tur kategoria individual dje seri aki ku a tuma lugá na Kòrsou. Un nota remarkabel ta ku e úniko kategoria ku e no a figurá komo number 1, tabata e kategoria di picheo, pasobra den e seri aki e no a mira akshon komo tal. Ku su prestashon komo bateadó i picher semper ela yuda selekshonnan den konkistanan di medaya den kompetensianan internashonal.
Na aña 1995 Aida Juliana a stòp ku sòfbòl organisá. Den e temporada ku a sigui aki ela duna lus na Sòntje Hooi. Despues ela kuminsá hunga sòfbòl veterano. “Den e fase aki mi yu tabata bai tur entrenamentu i weganan ku mi hunga, miéntras ku semper el a viaha kumi ku tambe bai torneonan afó. Pues Sòntje a lanta den ambiente deportivo. Di mes ma purba di siñele disiplina i respèt. E tambe a lanta tabata hunga beisbòl banda di kas ku bala di tènis i sòfbòl na skol. Ora ku e buta drama, e tabata bisa e otro muchanan: Bosnan no sa yu di ken mi ta noh? Yu di Soraida Juliana.”
Sòntje Hooi ta hunga futbòl profeshonal na Oropa. Ela kuminsá su karera den NAC Breda na aña 2012. E ta miembro di selekshon di futbòl di Kòrsou i ta hunga aktualmente na Dinamarka pa e tim profeshonal di futbòl Ermis Aradippou.
Mirando atras Soraida ‘Aida’ Juliana tin su opinion riba aseptashon i rekonosimentu di deportistanan femenino: “Deportistanan femenino mester haña mas rekonosimentu. Nos tabatin i tin deportistanan di hopi peso pa Kòrsou ku sinembargo di un òf otro manera nunka a haña rekonosimentu. Anto tambe por tin mas aseptashon di tèkniko femenino.”
