Sta Maria Pirates Chippie ayeranochi, djamars 24 di aprel, a gana su promé wega den e kampionato nobo di beisbòl dòbel A. Despues di a pèrdè e wega di apertura djasabra kontra di Wild Cats Guardian Group, e tim a rekuperá i superá Fire Birds OMB ku skor di 5-0.
Federashon Beisbòl di Kòrsou (Febeko) ta organisá e kompetensia: Liga Aqualectra. Esaki a kuminsá pues djasabra den Stadion Johnny Vrutaal i a sigui djadumingu na Stadion Heintje Kool i ayeranochi atrobe den Stadion Johnny Vrutaal.
Djadumingu Groot Kwartier Stars Mangusa a triunfá ku skor di 9-5 riba Royal Scorpions My Malls, miéntras ku Sta Rosa Indians a gana di Marchena Braves: 4-3.
Ayera djaluna Sta Maria a bolbe mira akshon, e biaha’ki kontra debutante Fire Birds. E tim aki a sali duna bon bataya den e promé mitar dje enkuentro, pero no por a wanta e ritmo di wega. E Piratanan a skor nan promé kareda den di sinku entrada (1-0) i despues a añadí dos mas den tantu di 6 komo di 8 inen pa asina seya e viktoria: 5-0.
Picher Johan Rifaela a gana e wega. E tabatin un tremendo aktuashon riba montíkulo. Den 7,2 inning ela ponchá 10 bateadó, duna 3 base por bola i pèrmití solamente 1 hit. Ela haña relevo den di 8 inen di Gustavo de Jongh, miéntras ku Jonathan Balentina a salba e wega den di 9 inen.
Picher Ronald Bloem a sufri e derota. Den sinku inen ela pèrmití 2 kareda i 7 hit, miéntras ku ela ponchá 6 bateadó i duna dos base por bola. Den di seis entrada Hendrick Kinburn a relev’é, pero a pèrmití 3 kareda riba 3 hit. Ela ponchá dos bateadó i duna tres base por bola den 3 inen di trabou.
Sherwenne Antersijn di Sta Maria Pirates a resultá e mihó bateadó dje enkuentro. Ela dal 4 hit den 5 turno i a empuhá 2 kareda, miéntras e mes a skor dos biaha. E úniko hit di Fire Birds a keda di dal pa Aldrinne Anastatia den dos turno na bate.
E kampionato di beisbòl dòbel A ta kontinuá awenochi, djarason 25 di aprel, den atrobe Stadion Johnny Vrutaal na Rif, Otrobanda. Marchena Braves ta hunga kontra di Wild Cats. E enkuentro aki ta kuminsá mitar di 8.
