Stakamahakchi Guardian Group a konkistá awenochi, djadumingu 22 di aprel 2018, pa di 5 aña konsekutivo e titulo kampionil den klase superior femenino di Federashon Vòlibòl Kòrsou (FeVoKo). Den superior maskulino tabata Watakeli ku a titulá kampion pa di dos aña siguí.
E serinan final den divishon máksimo a bai e minimo di wega. Tur dos a kaba den 3 wega. A hunga seri mihó di sinku wega. Tantu e bueltanan preliminar komo e ‘play-off’ i final a keda hungá den sala kubrí Errol Rooi di Sentro Deportivo Kòrsou (SDK) na Brievengat.
Apesar ku Shuatanari Lab de Med a duna bon bataya den e final femenino, tòg Stakamahakchi Guardian no a laga niun duda kua tim tabata mihó. E ekipo a gana e di tres wega ku 3-0 di Shuatanari Lab de Med. E parsialnan tabata: 25-20, 27-25 i 25-22.
Stakamahakchi asina a konkistá su di 5 titulo tras di otro. Atrobe tabata Christine Anthony ku tabata klave den e viktoria pa e tim ganadó.
Den klase superior maskulino Watakeli tambe a kaba e seri mihó di 5 wega den 3 enkuentro. E tim a sali pa di dos aña konsekutivo kampion di Kòrsou, derotando Xaverianen ku skor di 3-1. E parsialnan tabata: 25-21, 25-20, 22-25 i 25-19. Gibi Paulina a destaká pa e tim ganadó.
E final den klase A ta kontinuá mañan djaluna, 23 di aprel 2018. Den maskulino Watakeli ta 2-0 dilanti i pues por titulá kampion sí e tim gana atrobe di Green Tigers. Den femenino e seri final entre Stakamahakchi i Shuatanari ta empatá na 1 wega pa banda.
