Stakamahakchi den divishon máksimo femenino i Watakeli den maskulino a sigui invikto na komienso dje di dos buelta dje kampionato regular di Federahson Vòlibòl Kòrsou (Fevoko). Tur dos a gana ayera, djarason 9 di yanüari 2019, ku skor di 3-0 di nan kontrinkantenan.
E kampionato dediká na Dito Ravenstein a kontinuá ayera ku dos wega den sala Errol Rooi di Sentro Deportivo Kòrsou (SDK) na Brievengat. Tabata inisio dje di dos buelta den divishon máksimo di Fevoko.
Stakamahakchi ku a gana su kuater enkuentronan den promé buelta den kategoria femenino, a sali ayera brabu kontra di Green Jewels i gana e promé sèt relativamente fasil: 25-5. E tim a haña den di dos i tres sèt mas resistensia, pero a tòg no a duna e kontrinkante masha chèns: 25-12 i 25-18.
Awor Stakamahakchi tin 5 triunfo siguí, miéntras ku Green Jewels a sufri su di 5 derota i sin viktoria. E ta okupá e último puesto riba tabla di posishon.
Den divishon superior maskulino Watakeli tambe a gana su di sinku enkuentro sin derota. E kampion di Kòrsou a superá Green Tigers ku parsialnan di 25-15, 25-22 i 25-15. Esaki ta e di kuater derota pa Green Tigers ku te ainda a gana un wega só.
E kampionato di Fevoko ta sigui djadumingu awor, 13 di yanüari, ku diferente wega den sala Errol Rooi na SDK.
