Stakamahakchi den kategoria femenino i Xaverianen den divishon maskulino a daña e fiesta di kampion di nan kontrinkantenan. Ku triunfonan di 3-2 riba respektivamente Shuatanari i Watakeli nan a forsá weganan desisivo den final dje kampionato lokal.
Direktiva di Federashon Vòlibòl di Kòrsou (Fevoko) i fanátikonan te ainda por mira’tras riba serinan final bon bringá entre e finalistanan. E weganan ta hunga den Sala Errol Rooi di Sentro Deportivo Kòrsou (SDK).
Den divishon femenino superior Shuatanari a bin ku intenshon pa gana e wega i sigurá e titulo kampionil. Stakamahakchi sinembargo tabatin otro plan i a stroba e tim kontrali.
Despues di a pèrdè e promé sèt 20-25, Staka a gana e dos sètnan sigiuente relativamente fasil ku 25-16 i 25-17 i asina bai dilanti 2-1. Shuatanari no a entregá i a rekuperá na tempu ganando e di kuater sèt ku tambe fasil (25-16) pa asina forsá e di sinku sèt desisivo. Tabata Staka ku sinembargo tabatin mihó wega i a gana esaki ku 15-12.
Den divishon maskulino superior e fiesta kampionil di Watakeli a kai na awa ora ku Xaverianen a presentá desidido riba kancha. Watakeli a kuminsá bon ganando e promé sèt ku 25-15. Watakeli a tabla e skor ganando di dos sèt ku 25-19. Watakeli ta bolbe bai dilanti ku triunfo pèrtá di 27-25 den di tres sèt i tabata falta un sèt mas pa titulá kampion.
Xaverianen sinembargo a planiá su wega bon pa gana e di kuater sèt despues di un tremendo lucha: 25-21. E triunfo aki a sirbi komo boost pa e tim sigui motivá i gana e di sinku sèt ku skor di 15-10 pa asina forsá un wega desisivo den e kategoria aki.
E weganan final ta haña nan kulminashon djadumingu awor den Sala Errol Rooi di SDK na Brievengat.
