E dos selekshonnan di beisbòl di Liga Pabou ku ta hungando na respektivamente Repúblika Dominikana i Puerto Rico, ainda ta invikto. Tur dos a klasifiká tambe kaba pa semifinal.
E kompetensia Latín-Americano di Intermediate league ta tumando lugá na Santo Domingo, Repúblika Dominikana. E kompetensia aki ta pa hungadónan den e grupo di edat di 11-13 aña.
Liga Pabou Intermediate a gana tur e tres weganan den pul B. E selekshon a gana su promé wega di Repúblika Dominikana (4-3), despues di Colombia (15-1) i finalmente a gana tambe di Aruba ku 8-0. Asina Liga Pabou ta e lider invikto den e pul aki i tambe a sigurá su partisipashon den e semifinal.
Den poule A, Venezuela, ku ta representá pa e tim Coquivacoa, tambe ta invikto i na e promé puesto. E Venezolanonan a gana di México ku 6-2, di Costa Rica ku 12-2 i a di Honduras ku e skor abultá di 22-1.
E kampionato Latino-Amerikano di Intermediate ta un día di deskanso awe. E dos weganan di semifinal ta mañan na 1or tra’i mèrdia i 4or atardi. E final entre e dos ganador dje semifinal ta tuma lugá djasabra i ta kuminsá 2or tra’i mèrdia.
E kompetensia di Senior league di Karibe na Puerto Rico ta pa hungadónan di 15 i 16 aña. E selekshon di Liga Pabou te awo a gana tur su kuater weganan. Promé a gana di Repúblika Dominikano ku 7-4. Den e di dow enkuentro a superá Aruba ku 9-8. A derotá Puerto Rico ku un skor pèrtá di 3-2, mientras ku Islanan Virgin di Merka a haña sota di 14-0.
E último enkuentro di Liga Pabou den e bueltanan preleminar tabatin ku hunga awe kontra e di dos tim di Puerto Rico. E wega a kanselá pa motibu di awaseru. E selekshon di Kòrsou a klasifiká kaba sí pa semifinal. E seri aki ta hunga mañan djabièrnè 4or di atardi i 7or di anochi. E wega final ta programá pa djasabra 7or di anochi.
